ਕੀਵ (ਬਿਊਰੋ): ਯੂਕ੍ਰੇਨ ਦੇ ਸ਼ਹਿਰ ਮਾਰੀਉਪੋਲ 'ਤੇ ਕਬਜ਼ੇ ਦੌਰਾਨ ਰੂਸ ਦੀ ਕੈਦ ਵਿੱਚ ਰਹੇ ਯੂਕ੍ਰੇਨੀ ਫ਼ੌਜੀ ਦੀਆਂ ਦਿਲ ਦਹਿਲਾ ਦੇਣ ਵਾਲੀਆਂ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਖੂਬ ਸ਼ੇਅਰ ਕੀਤੀਆਂ ਜਾ ਰਹੀਆਂ ਹਨ। ਫ਼ੌਜੀ ਦੇ ਰੂਸ ਦੀ ਕੈਦ ਵਿੱਚ ਜਾਣ ਤੋਂ ਪਹਿਲਾਂ ਅਤੇ ਬਾਅਦ ਦੀਆਂ ਇਹ ਤਸਵੀਰਾਂ ਇਸ ਜੰਗ ਦੀ ਭਿਆਨਕਤਾ ਦੀ ਜਿਉਂਦੀ ਜਾਗਦੀ ਮਿਸਾਲ ਹਨ। ਰੂਸ ਅਤੇ ਯੂਕ੍ਰੇਨ ਵਿਚਾਲੇ ਜੰਗ ਨੂੰ ਸੱਤ ਮਹੀਨੇ ਤੋਂ ਵੱਧ ਸਮਾਂ ਬੀਤ ਚੁੱਕਾ ਹੈ। ਇਸ ਲੰਬੀ ਲੜਾਈ ਵਿੱਚ ਦੋਵਾਂ ਧਿਰਾਂ ਦਾ ਕਾਫੀ ਨੁਕਸਾਨ ਹੋਇਆ ਹੈ। ਹਾਲ ਹੀ ਵਿੱਚ ਜ਼ਪੋਰੀਜ਼ੀਆ ਦੇ ਗਵਰਨਰ ਓਲੇਕਸੈਂਡਰ ਸਟਾਰੁਖ ਨੇ ਕਿਹਾ ਕਿ ਰੂਸ ਨੇ ਡਨਿਪਰ ਨਦੀ ਦੇ ਸ਼ਹਿਰ ਨੂੰ ਨਿਸ਼ਾਨਾ ਬਣਾਇਆ ਅਤੇ ਇੱਕ ਮਿਜ਼ਾਈਲ ਇੱਕ ਅਪਾਰਟਮੈਂਟ ਬਿਲਡਿੰਗ 'ਤੇ ਲੱਗੀ, ਜਿਸ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਸੱਤ ਹੋਰ ਜ਼ਖਮੀ ਹੋ ਗਏ।
ਯੂਕ੍ਰੇਨੀ ਸਿਪਾਹੀ ਮਿਖਾਈਲੋ ਡਾਇਨੋਵ ਨੂੰ ਰੂਸ ਨੇ ਮਾਰੀਉਪੋਲ 'ਤੇ ਕਬਜ਼ਾ ਕਰਨ ਤੋਂ ਬਾਅਦ ਹਿਰਾਸਤ ਵਿਚ ਲੈ ਲਿਆ ਸੀ। ਉਹ ਅਜ਼ੋਵਸਟਲ ਸਟੀਲ ਪਲਾਂਟ ਨੂੰ ਬਚਾਉਣ ਲਈ ਲੜ ਰਿਹਾ ਸੀ। ਡਾਇਨੋਵ ਉਨ੍ਹਾਂ 205 ਯੂਕ੍ਰੇਨੀ ਜੰਗੀ ਕੈਦੀਆਂ ਵਿੱਚੋਂ ਇੱਕ ਹੈ, ਜਿਨ੍ਹਾਂ ਨੂੰ ਬੁੱਧਵਾਰ ਰਾਤ ਨੂੰ ਰਿਹਾਅ ਕੀਤਾ ਗਿਆ ਸੀ। ਉਨ੍ਹਾਂ ਦੀ ਕੁਝ ਮਹੀਨੇ ਪੁਰਾਣੀ ਤਸਵੀਰ ਹੁਣ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੀ ਜਾ ਰਹੀ ਹੈ। ਮਈ ਦੀ ਫੋਟੋ ਵਿੱਚ ਡਾਇਨੋਵ ਚਾਹ ਦੇ ਕੱਪ ਨਾਲ ਜ਼ਖਮੀ ਹਾਲਤ ਵਿੱਚ ਦਿਖਾਈ ਦੇ ਰਿਹਾ ਹੈ। ਸਟੀਲ ਪਲਾਂਟ 'ਤੇ ਕਬਜ਼ੇ ਦੌਰਾਨ ਰੂਸੀ ਹਮਲੇ 'ਚ ਉਸ ਦਾ ਹੱਥ ਫਰੈਕਚਰ ਹੋ ਗਿਆ ਸੀ।
ਚਾਰ ਮਹੀਨਿਆਂ ਬਾਅਦ ਪਛਾਣਨਾ ਵੀ ਮੁਸ਼ਕਲ
ਇਸ ਫੋਟੋ ਵਿਚ ਉਹ ਥੱਕਿਆ ਹੋਇਆ ਨਜ਼ਰ ਆ ਰਿਹਾ ਹੈ, ਉਸ ਦੀ ਦਾੜ੍ਹੀ ਵਧੀ ਹੋਈ ਹੈ ਪਰ ਉਸ ਦੀ ਸਰੀਰਕ ਹਾਲਤ ਆਮ ਲੱਗ ਰਹੀ ਹੈ। ਡਾਇਨੋਵ ਦੀ ਨਵੀਨਤਮ ਫੋਟੋ ਨੂੰ ਦੇਖ ਕੇ ਕਿਸੇ ਦੇ ਵੀ ਰੋਂਗਟੇ ਖੜ੍ਹੇ ਹੋ ਸਕਦੇ ਹਨ।ਇਸ 'ਚ ਉਹ ਕਾਫੀ ਪਤਲਾ ਨਜ਼ਰ ਆ ਰਿਹਾ ਹੈ ਅਤੇ ਉਸ ਦੇ ਹੱਥਾਂ ਅਤੇ ਚਿਹਰੇ 'ਤੇ ਜ਼ਖਮ ਹਨ। ਹਿਰਾਸਤ ਵਿਚ ਲਿਆ ਗਿਆ ਸਮੂਹ ਅਜ਼ੋਵ ਮਿਲਟਰੀ ਯੂਨਿਟ ਦਾ ਹਿੱਸਾ ਸੀ। ਉਨ੍ਹਾਂ ਨੂੰ ਰੂਸ ਦੇ ਜੇਲ੍ਹ ਕੈਂਪਾਂ ਵਿੱਚ ਚਾਰ ਮਹੀਨਿਆਂ ਤੱਕ ਰੱਖਿਆ ਗਿਆ ਸੀ। ਕੁਝ ਕੱਟੜਪੰਥੀ ਕ੍ਰੇਮਲਿਮ ਸਮਰਥਕ ਉਨ੍ਹਾਂ ਨੂੰ ਅਪਰਾਧੀ ਅਤੇ ਨਾਜ਼ੀ ਕਹਿ ਰਹੇ ਸਨ ਅਤੇ ਉਨ੍ਹਾਂ ਦੇ ਕਤਲ ਦੀ ਮੰਗ ਕਰ ਰਹੇ ਸਨ।
ਪੜ੍ਹੋ ਇਹ ਅਹਿਮ ਖ਼ਬਰ- ਕੈਨੇਡਾ ਤੋਂ ਆਈ ਮੰਦਭਾਗੀ ਖ਼ਬਰ, ਫਰੀਦਕੋਟ ਦੇ ਗੁਰਕੀਰਤਪਾਲ ਸਿੰਘ ਖੋਸਾ ਦੀ ਟਰੱਕ ਹਾਦਸੇ 'ਚ ਮੌਤ
ਹੱਥ ਤੋਂ 4 ਸੈਂਟੀਮੀਟਰ ਦੀ ਹੱਡੀ ਗਾਇਬ
ਇਸ ਹਫ਼ਤੇ ਕੈਦੀਆਂ ਦੀ ਵੱਡੀ ਅਦਲਾ-ਬਦਲੀ ਦੇ ਹਿੱਸੇ ਵਜੋਂ ਉਸਦੀ ਰਿਹਾਈ ਤੋਂ ਬਾਅਦ ਉਸਨੂੰ ਚੇਰਨੀਹੀਵ ਦੇ ਇੱਕ ਹਸਪਤਾਲ ਵਿੱਚ ਦੋਸਤਾਂ ਅਤੇ ਰਿਸ਼ਤੇਦਾਰਾਂ ਨਾਲ ਫੋਟੋਆਂ ਵਿੱਚ ਦੇਖਿਆ ਗਿਆ ਸੀ। ਇੱਥੋਂ ਉਸ ਨੂੰ ਕੀਵ ਮਿਲਟਰੀ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸ ਦੀ ਭੈਣ ਨੇ ਕਿਹਾ ਕਿ ਉਸ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ ਅਤੇ ਉਸ ਦਾ ਇਲਾਜ ਲੰਬਾ ਹੋਵੇਗਾ। ਖ਼ਬਰਾਂ ਮੁਤਾਬਕ ਡਾਇਨੋਵ ਨੂੰ ਕੈਦ ਵਿੱਚ ਅਣਮਨੁੱਖੀ ਹਾਲਾਤ ਦਾ ਸਾਹਮਣਾ ਕਰਨਾ ਪਿਆ। ਉਸਦਾ ਹੱਥ ਅਜੇ ਠੀਕ ਨਹੀਂ ਹੋਇਆ ਹੈ ਅਤੇ 4 ਸੈਂਟੀਮੀਟਰ ਦੀ ਹੱਡੀ ਗਾਇਬ ਸੀ।
Credit : www.jagbani.com
