ਗੁਰਦਾਸਪੁਰ (ਵਿਨੋਦ) : ਗੁਆਂਢੀ ਮੁਲਕ ਪਾਕਿਸਤਾਨ ਤੋਂ ਇਕ ਦੁਖ਼ਦਾਈ ਖ਼ਬਰ ਪ੍ਰਾਪਤ ਹੋਈ ਹੈ, ਜਿੱਥੇ ਅਣਖ ਦੀ ਖ਼ਾਤਰ ਆਪਣੀ ਹੀ ਔਲਾਦ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ ਹੈ। ਇਹ ਮਾਮਲਾ ਹੈ ਪਾਕਿਸਤਾਨ ਦੇ ਸਾਹੀਵਾਲ ਜ਼ਿਲ੍ਹੇ ਦੇ ਅਹਿਮਦਯਾਰ ਥਾਣਾ ਅਧੀਨ ਪੈਂਦੇ ਇਕ ਪਿੰਡ ਦਾ, ਜਿੱਥੇ ਮਾਪਿਆਂ ਨੇ ਆਪਣੀ ਵਿਆਹੁਤਾ ਧੀ ਨੂੰ ਜ਼ਹਿਰ ਦੇ ਕੇ ਮਾਰ ਸੁੱਟਿਆ ਹੈ। ਮ੍ਰਿਤਕਾ ਬਿਸਮਾ ਕੌਸਰ ਦੇ ਪਤੀ ਨਾਸਿਰ ਅਹਿਮਦ ਦੀ ਸ਼ਿਕਾਇਤ ’ਤੇ ਮ੍ਰਿਤਕਾ ਦੀ ਮਾਂ ਸਾਦੀਕਾਨ ਬੀਬੀ ਅਤੇ ਉਸ ਦੇ ਪਿਤਾ ਸੁਭਾਈ ਸਾਦਿਕ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਦੋਵਾਂ ਮੁਲਜ਼ਮਾਂ ਨੇ ਆਪਣਾ ਜੁਰਮ ਕਬੂਲ ਕਰ ਲਿਆ ਹੈ।
ਸਰਹੱਦ ਪਾਰਲੇ ਸੂਤਰਾਂ ਅਨੁਸਾਰ ਪਿੰਡ 111/ਈਬੀ ਦੀ ਰਹਿਣ ਵਾਲੀ ਬਿਸਮਾ ਕੌਸਰ ਦਾ ਵਿਆਹ 6 ਮਹੀਨੇ ਪਹਿਲਾਂ ਪਿੰਡ 79/ਈਬੀ ਦੇ ਨਾਸਿਰ ਅਹਿਮਦ ਨਾਲ ਹੋਇਆ ਸੀ। ਖਬਰਾਂ ਮੁਤਾਬਕ ਬਿਸਮਾ ਨਾਸਿਰ ਨਾਲ ਵਿਆਹ ਕਰਨ ਲਈ ਤਿਆਰ ਨਹੀਂ ਸੀ ਅਤੇ ਉਸ ਦਾ ਪਿੰਡ ਦੇ ਰਹਿਣ ਵਾਲੇ ਇਮਰਾਨ ਨਾਲ ਅਫੇਅਰ ਚੱਲ ਰਿਹਾ ਸੀ। ਵਿਆਹ ਤੋਂ ਬਾਅਦ ਬਿਸਮਾ ਆਪਣੇ ਪ੍ਰੇਮੀ ਇਮਰਾਨ ਨਾਲ ਫਰਾਰ ਹੋ ਗਈ, ਜਿਸ ਕਾਰਨ ਉਸ ਦੀ ਮਾਂ ਸਾਦਿਕਨ ਨੇ ਆਰਿਫਵਾਲਾ ਸਦਰ ਪੁਲਸ ਨੂੰ ਬਿਸਮਾ ਅਤੇ ਇਮਰਾਨ ਖਿਲਾਫ ਮਾਮਲਾ ਦਰਜ ਕਰਨ ਲਈ ਕਿਹਾ। ਹਾਲਾਂਕਿ ਬਿਸਮਾ ਨੇ ਅਦਾਲਤ ’ਚ ਇਮਰਾਨ ਦੇ ਪੱਖ ’ਚ ਗਵਾਹੀ ਦਿੱਤੀ ਅਤੇ ਦਾਅਵਾ ਕੀਤਾ ਕਿ ਉਹ ਆਪਣੇ ਪਤੀ ਨਾਸਿਰ ਦੇ ਦੁਰਵਿਵਹਾਰ ਕਾਰਨ ਉਸ ਦਾ ਘਰ ਛੱਡ ਗਈ ਸੀ, ਜਿਸ ’ਤੇ ਕੇਸ ਖਾਰਜ ਹੋ ਗਿਆ ਅਤੇ ਬਿਸਮਾ ਆਪਣੇ ਪੇਕੇ ਘਰ ਪਰਤ ਗਈ।
ਕੁਝ ਦਿਨ ਪਹਿਲਾਂ ਬਿਸਮਾ ਦੇ ਪਤੀ ਨਾਸਿਰ ਅਹਿਮਦ ਨੇ ਬਿਸਮਾ ਦੇ ਮਾਤਾ-ਪਿਤਾ ਨੂੰ ਉਸ ਨੂੰ ਵਾਪਸ ਭੇਜਣ ਦੀ ਬੇਨਤੀ ਕੀਤੀ ਸੀ, ਜਿਸ ’ਤੇ ਉਹ ਸਹਿਮਤ ਹੋ ਗਏ। ਹਾਲਾਂਕਿ ਬਿਸਮਾ ਨੇ ਨਾਸਿਰ ਦੇ ਘਰ ਵਾਪਸ ਜਾਣ ਤੋਂ ਇਨਕਾਰ ਕਰ ਦਿੱਤਾ, ਜਿਸ ’ਤੇ ਉਸ ਦੇ ਮਾਤਾ-ਪਿਤਾ ਉਸ ਨੂੰ ਜ਼ਹਿਰ ਦੀਆਂ ਗੋਲੀਆਂ ਖਾਣ ਲਈ ਮਜਬੂਰ ਕਰ ਦਿੱਤਾ। ਪੁਲਸ ਨੇ ਲਾਸ਼ ਨੂੰ ਪੋਸਟ ਮਾਰਟਮ ਲਈ ਆਰਿਫ਼ਵਾਲਾ ਤਹਿਸੀਲ ਹੈੱਡਕੁਆਰਟਰ ਹਸਪਤਾਲ ਭੇਜ ਦਿੱਤਾ ਹੈ। ਮ੍ਰਿਤਕ ਦੇ ਮਾਪਿਆਂ ਨੇ ਆਪਣਾ ਜੁਰਮ ਕਬੂਲ ਕਰਦਿਆਂ ਮੰਨਿਆ ਕਿ ਬਿਸਮਾ ਕਾਰਨ ਪਿੰਡ ਵਿਚ ਉਨ੍ਹਾਂ ਦੀ ਬਦਨਾਮੀ ਹੋ ਰਹੀ ਸੀ, ਜਿਸ ਕਾਰਨ ਬਿਸਮਾ ਨੂੰ ਜ਼ਹਿਰ ਦੇ ਕੇ ਕਤਲ ਕਰ ਦਿੱਤਾ ਗਿਆ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
Credit : www.jagbani.com
