ਸਪੋਰਟਸ ਡੈਸਕ- ਸਲਾਮੀ ਬੱਲੇਬਾਜ਼ ਕੇਐਲ ਰਾਹੁਲ ਇਸ ਸਮੇਂ ਟੀਮ ਇੰਡੀਆ ਲਈ ਸੰਕਟਮੋਚਕ ਬਣੇ ਹੋਏ ਹਨ। ਉਨ੍ਹਾਂ ਨੇ ਇੰਗਲੈਂਡ ਵਿਰੁੱਧ ਹਰ ਮੈਚ ਵਿੱਚ ਦੌੜਾਂ ਬਣਾਈਆਂ ਹਨ। ਮੈਨਚੈਸਟਰ ਟੈਸਟ ਮੈਚ ਦੇ ਚੌਥੇ ਦਿਨ, ਕੇਐਲ ਰਾਹੁਲ ਨੇ ਕਪਤਾਨ ਸ਼ੁਭਮਨ ਗਿੱਲ ਨਾਲ ਮਿਲ ਕੇ ਹੁਣ ਤੱਕ ਤੀਜੀ ਵਿਕਟ ਲਈ 174 ਦੌੜਾਂ ਦੀ ਸਾਂਝੇਦਾਰੀ ਕੀਤੀ ਹੈ। ਚੌਥੇ ਦਿਨ ਦੀ ਖੇਡ ਦੇ ਅੰਤ ਤੱਕ, ਰਾਹੁਲ 87 ਅਤੇ ਗਿੱਲ 78 ਦੌੜਾਂ ਨਾਲ ਖੇਡ ਰਹੇ ਹਨ। ਇਸ ਦੌਰਾਨ, ਉਨ੍ਹਾਂ ਬਾਰੇ ਇੱਕ ਅਜਿਹਾ ਖੁਲਾਸਾ ਹੋਇਆ, ਜਿਸ ਨੇ ਲੋਕਾਂ ਨੂੰ ਹੈਰਾਨ ਕਰ ਦਿੱਤਾ ਹੈ। ਕੇਐਲ ਰਾਹੁਲ ਕ੍ਰਿਕਟ ਨੂੰ ਇੰਨਾ ਪਿਆਰ ਕਰਦੇ ਹਨ ਕਿ ਇਸ ਦੇ ਲਈ ਉਹ ਬੱਸ ਚਲਾ ਚੁੱਕੇ ਹਨ, ਪਲੇਨ ਉਡਾ ਚੁੱਕੇ ਹਨ ਹੈ ਅਤੇ ਖਾਣਾ ਵੀ ਬਣਾ ਚੁੱਕੇ ਹਨ। ਇਹ ਖੁਲਾਸਾ ਇੱਕ ਇੰਟਰਵਿਊ ਦੌਰਾਨ ਹੋਇਆ। ਇਸ ਦੌਰਾਨ, ਦਿੱਲੀ ਕੈਪੀਟਲਜ਼ ਦੇ ਕੋਚ ਨੇ ਉਨ੍ਹਾਂ ਬਾਰੇ ਇੱਕ ਵੱਡੀ ਗੱਲ ਕਹੀ ਹੈ।
ਕੇਐਲ ਰਾਹੁਲ ਸੰਕਟਮੋਚਕ ਬਣੇ!
ਕੇਐਲ ਰਾਹੁਲ ਨੇ ਹੁਣ ਤੱਕ ਮੈਨਚੈਸਟਰ ਟੈਸਟ ਮੈਚ ਵਿੱਚ ਭਾਰਤੀ ਟੀਮ ਨੂੰ ਹਾਰ ਤੋਂ ਬਚਾਉਣ ਲਈ ਕਪਤਾਨ ਸ਼ੁਭਮਨ ਗਿੱਲ ਨਾਲ 174 ਦੌੜਾਂ ਦੀ ਸਾਂਝੇਦਾਰੀ ਕੀਤੀ ਹੈ। ਮੈਚ ਦੇ ਆਖਰੀ ਦਿਨ ਉਨ੍ਹਾਂ ਤੋਂ ਇੱਕ ਵੱਡੀ ਪਾਰੀ ਦੀ ਉਮੀਦ ਹੈ। ਉਹ ਇਸ ਸਮੇਂ ਟੀਮ ਲਈ ਸੰਕਟਮੋਚਕ ਹਨ। ਚੌਥੇ ਦਿਨ ਦੀ ਖੇਡ ਖਤਮ ਹੋਣ ਤੋਂ ਬਾਅਦ, ਸੋਨੀ ਸਪੋਰਟਸ ਪੋਡਕਾਸਟ ਦੌਰਾਨ, ਐਂਕਰ ਗੌਰਵ ਕਪੂਰ ਨੇ ਦਿੱਲੀ ਕੈਪੀਟਲਸ ਦੇ ਕੋਚ ਹੇਮਾਂਗ ਬਦਾਨੀ ਅਤੇ ਸਾਬਕਾ ਤੇਜ਼ ਗੇਂਦਬਾਜ਼ ਆਰਪੀ ਸਿੰਘ ਨਾਲ ਗੱਲ ਕਰਦੇ ਹੋਏ ਕੇਐਲ ਰਾਹੁਲ ਬਾਰੇ ਇੱਕ ਵੱਡਾ ਖੁਲਾਸਾ ਕੀਤਾ। ਉਨ੍ਹਾਂ ਕਿਹਾ, "ਕੇਐਲ ਰਾਹੁਲ ਕਿਸੇ ਵੀ ਨੰਬਰ 'ਤੇ ਖੇਡ ਸਕਦਾ ਹੈ। ਇਸ ਤੋਂ ਇਲਾਵਾ, ਉਹ ਕਪਤਾਨੀ ਕਰ ਲੈਂਦਾ ਹੈ, ਵਿਕਟਕੀਪਿੰਗ ਕਰ ਲੈਂਦਾ ਹੈ, ਸਲਿੱਪ 'ਚ ਖੜ੍ਹਾ ਹੋ ਜਾਂਦਾ ਹੈ"।
ਆਈਪੀਐਲ 2025 ਦੌਰਾਨ ਕੀਤਾ ਇਹ ਕੰਮ
ਇਸ 'ਤੇ, ਹੇਮਾਂਗ ਬਦਾਨੀ ਨੇ ਕਿਹਾ ਕਿ ਕੇਐਲ ਰਾਹੁਲ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐਲ) 2025 ਵਿੱਚ ਦਿੱਲੀ ਕੈਪੀਟਲਸ ਲਈ ਖੇਡ ਰਿਹਾ ਸੀ। ਇਸ ਦੌਰਾਨ ਉਸਨੇ ਨੰਬਰ-4 'ਤੇ ਬੱਲੇਬਾਜ਼ੀ ਕੀਤੀ, ਨੰਬਰ-3 'ਤੇ ਬੱਲੇਬਾਜ਼ੀ ਵੀ ਕੀਤੀ, ਓਪਨਿੰਗ ਵੀ ਕੀਤੀ। ਫਿਰ ਟੂਰਨਾਮੈਂਟ ਦੌਰਾਨ, ਉਸਨੂੰ ਵਿਕਟਕੀਪਿੰਗ ਛੱਡ ਕੇ ਫੀਲਡਿੰਗ ਕਰਨ ਲਈ ਕਿਹਾ ਗਿਆ, ਇਸ ਲਈ ਉਸਨੇ ਉਹ ਵੀ ਕੀਤਾ। ਸਾਨੂੰ ਮੈਦਾਨ ਵਿੱਚ ਜੋ ਵੀ ਕਰਨਾ ਪਿਆ, ਉਸਨੇ ਸਭ ਕੁਝ ਕੀਤਾ, ਸਿਰਫ ਗੇਂਦਬਾਜ਼ੀ ਨਹੀਂ। ਇਸ 'ਤੇ ਗੌਰਵ ਕਪੂਰ ਨੇ ਕਿਹਾ ਕਿ ਰਾਹੁਲ ਉਹ ਵੀ ਕਰੇਗਾ।
ਇਸ ਦੌਰਾਨ ਗੌਰਵ ਨੇ ਕਿਹਾ, "ਤੁਸੀਂ ਇਹ ਨਹੀਂ ਦੱਸਿਆ ਕਿ ਮੈਚ ਤੋਂ ਬਾਅਦ, ਉਹ ਟੀਮ ਬੱਸ ਚਲਾਉਂਦਾ ਸੀ, ਜਹਾਜ਼ ਉਡਾਉਂਦਾ ਸੀ, ਸਾਰਿਆਂ ਲਈ ਖਾਣਾ ਬਣਾਉਂਦਾ ਸੀ। ਸ਼ਾਇਦ ਜੇਕਰ ਅਸੀਂ ਉਸ ਤੋਂ ਕੁਝ ਹੋਰ ਕਰਨ ਲਈ ਵੀ ਕਹਿੰਦੇ, ਤਾਂ ਉਹ ਉਹ ਵੀ ਕਰਦਾ"। ਇਸ ਦੌਰਾਨ, ਆਰਪੀ ਸਿੰਘ ਨੇ ਕਿਹਾ ਕਿ ਕੇਐਲ ਰਾਹੁਲ ਆਈਪੀਐਲ ਦੌਰਾਨ ਕੋਚਿੰਗ ਵੀ ਕਰਦਾ ਸੀ। ਉਹ ਟੀਮ ਵੀ ਬਣਾਉਂਦਾ ਸੀ। ਉਹ ਸਭ ਕੁਝ ਕਰਦਾ ਸੀ। ਹੁਣ ਉਹ ਇੰਗਲੈਂਡ ਵਿਰੁੱਧ ਟੈਸਟ ਸੀਰੀਜ਼ ਵਿੱਚ ਸ਼ਾਨਦਾਰ ਬੱਲੇਬਾਜ਼ੀ ਕਰ ਰਿਹਾ ਹੈ।
ਕੇਐਲ ਰਾਹੁਲ ਦਾ ਇੰਗਲੈਂਡ ਵਿਰੁੱਧ ਪ੍ਰਦਰਸ਼ਨ
ਟੀਮ ਇੰਡੀਆ ਦੇ ਓਪਨਿੰਗ ਬੱਲੇਬਾਜ਼ ਕੇਐਲ ਰਾਹੁਲ ਨੇ ਇੰਗਲੈਂਡ ਵਿਰੁੱਧ ਇਸ ਟੈਸਟ ਸੀਰੀਜ਼ ਵਿੱਚ ਹੁਣ ਤੱਕ 8 ਪਾਰੀਆਂ ਵਿੱਚ 72.57 ਦੀ ਔਸਤ ਨਾਲ 508 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ, ਉਸਨੇ ਹੁਣ ਤੱਕ ਦੋ ਸੈਂਕੜੇ ਅਤੇ ਦੋ ਅਰਧ ਸੈਂਕੜੇ ਲਗਾਏ ਹਨ। ਇਸ ਸੀਰੀਜ਼ ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦੇ ਮਾਮਲੇ ਵਿੱਚ, ਰਾਹੁਲ ਸ਼ੁਭਮਨ ਗਿੱਲ ਤੋਂ ਬਾਅਦ ਦੂਜੇ ਸਥਾਨ 'ਤੇ ਹੈ। ਸ਼ੁਭਮਨ ਗਿੱਲ ਨੇ ਹੁਣ ਤੱਕ 697 ਦੌੜਾਂ ਬਣਾਈਆਂ ਹਨ। ਹੁਣ ਮੈਨਚੈਸਟਰ ਟੈਸਟ ਮੈਚ ਵਿੱਚ, ਗਿੱਲ ਅਤੇ ਰਾਹੁਲ ਨੂੰ ਟੀਮ ਨੂੰ ਹਾਰ ਤੋਂ ਬਚਾਉਣ ਲਈ ਆਖਰੀ ਦਿਨ ਇੱਕ ਵੱਡੀ ਪਾਰੀ ਖੇਡਣੀ ਪਵੇਗੀ।
Credit : www.jagbani.com
