ਮੈਕਸੀਕੋ ਸਿਟੀ (ANI) : ਮੈਕਸੀਕੋ ਦੀ ਰਾਸ਼ਟਰਪਤੀ ਕਲਾਉਡੀਆ ਸ਼ੀਨਬੌਮ ਨੇ ਇੱਕ ਵਿਅਕਤੀ ਵਿਰੁੱਧ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ, ਜਿਸਨੇ ਉਨ੍ਹਾਂ ਮੁਤਾਬਕ ਮੰਗਲਵਾਰ ਨੂੰ ਉਨ੍ਹਾਂ ਨੂੰ 'ਸ਼ਰਾਬੀ' ਦੀ ਹਾਲਤ 'ਚ ਛੇੜਿਆ। ਸ਼ੀਨਬੌਮ ਨੇ ਇਸ ਘਟਨਾ ਨੂੰ "ਸਾਰੀਆਂ ਔਰਤਾਂ 'ਤੇ ਹਮਲਾ" ਕਰਾਰ ਦਿੱਤਾ ਹੈ।
ਮੈਕਸੀਕੋ ਸਿਟੀ ਦੇ ਮੇਅਰ ਕਲਾਰਾ ਬਰੂਗਾਡਾ (Clara Brugada) ਦੇ ਅਨੁਸਾਰ, ਮੁਲਜ਼ਮ ਵਿਅਕਤੀ ਨੂੰ ਰਾਤ ਨੂੰ ਹੀ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਅਤੇ ਉਹ ਇਸ ਸਮੇਂ ਸੈਕਸ ਅਪਰਾਧ ਜਾਂਚ ਯੂਨਿਟ ਦੀ ਹਿਰਾਸਤ ਵਿੱਚ ਹੈ।
ਵਾਇਰਲ ਫੁਟੇਜ ਦੇ ਅਨੁਸਾਰ, ਇਹ ਘਟਨਾ ਮੰਗਲਵਾਰ ਨੂੰ ਜ਼ੋਕਾਲੋ (Zocalo) ਦੇ ਕੇਂਦਰੀ ਇਲਾਕੇ ਵਿੱਚ ਵਾਪਰੀ, ਜਦੋਂ ਇੱਕ ਵਿਅਕਤੀ ਰਾਸ਼ਟਰਪਤੀ ਸ਼ੀਨਬੌਮ ਨੂੰ ਮਿਲਣ ਆਏ ਲੋਕਾਂ ਦੀ ਭੀੜ ਵਿੱਚੋਂ ਰਾਸ਼ਟਰਪਤੀ ਵੱਲ ਵਧਿਆ। ਵੀਡੀਓ 'ਚ ਦਿਖਾਇਆ ਗਿਆ ਕਿ ਉਹ ਵਿਅਕਤੀ ਉਨ੍ਹਾਂ ਦੇ ਬ੍ਰੈਸਟ ਨੂੰ ਛੂਹਣ ਲੱਗਾ ਅਤੇ ਉਨ੍ਹਾਂ ਨੂੰ ਚੁੰਮਣ ਦੀ ਕੋਸ਼ਿਸ਼ ਕੀਤੀ। ਰਾਸ਼ਟਰਪਤੀ ਦੇ ਚੋਟੀ ਦੇ ਸਹਾਇਕ, ਜੁਆਨ ਜੋਸ ਰਾਮੀਰੇਜ਼ ਮੇਂਡੋਜ਼ਾ (Juan Jose Ramirez Mendoza) ਦੇ ਦਖਲ ਦੇਣ ਤੋਂ ਸ਼ਰਾਬੀ ਵਿਅਕਤੀ ਪਿੱਛੇ ਹਟ ਗਿਆ।
ਮੈਕਸੀਕੋ ਦੀ ਪਹਿਲੀ ਮਹਿਲਾ ਰਾਸ਼ਟਰਪਤੀ ਸ਼ੀਨਬੌਮ ਨੇ ਬੁੱਧਵਾਰ ਨੂੰ ਕਿਹਾ ਕਿ ਉਨ੍ਹਾਂ ਨੇ ਮਾਮਲਾ ਦਰਜ ਕਰਵਾਉਣ ਦਾ ਫੈਸਲਾ ਕੀਤਾ ਕਿਉਂਕਿ ਇਹ ਇੱਕ ਅਜਿਹਾ ਤਜਰਬਾ ਹੈ ਜਿਸ ਦਾ ਸਾਹਮਣਾ ਦੇਸ਼ ਦੀਆਂ ਸਾਰੀਆਂ ਔਰਤਾਂ ਕਰਦੀਆਂ ਹਨ। ਉਨ੍ਹਾਂ ਨੇ ਕਿਹਾ, "ਕਿਸੇ ਵੀ ਮਰਦ ਨੂੰ ਉਸ ਜਗ੍ਹਾ ਦੀ ਉਲੰਘਣਾ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ"।
ਇਸ ਘਟਨਾ ਨੇ ਜਨਤਕ ਜੀਵਨ ਵਿੱਚ ਔਰਤਾਂ ਦੀ ਸੁਰੱਖਿਆ ਅਤੇ ਛੇੜਛਾੜ ਬਾਰੇ ਬਹਿਸ ਨੂੰ ਨਵਾਂ ਰੂਪ ਦਿੱਤਾ ਹੈ। ਮੈਕਸੀਕੋ ਸਿਟੀ ਪੁਲਸ ਨੇ ਸ਼ੁਰੂਆਤੀ ਜਾਂਚ ਵਿੱਚ ਇਹ ਵੀ ਦੱਸਿਆ ਹੈ ਕਿ ਇਹ ਵਿਅਕਤੀ ਉਸੇ ਦਿਨ ਦੋ ਹੋਰ ਔਰਤਾਂ ਦੀ ਕਥਿਤ ਛੇੜਛਾੜ ਨਾਲ ਵੀ ਜੁੜਿਆ ਹੋਇਆ ਹੈ। ਰਾਸ਼ਟਰਪਤੀ ਸ਼ੀਨਬੌਮ ਆਪਣੇ ਕੈਰੀਅਰ ਦੌਰਾਨ ਪਹਿਲਾਂ ਵੀ ਛੇੜਛਾੜ ਦੇ ਆਪਣੇ ਅਨੁਭਵਾਂ, ਜਿਵੇਂ ਕਿ 12 ਸਾਲ ਦੀ ਉਮਰ ਵਿੱਚ ਅਤੇ ਇੱਕ ਵਿਦਿਆਰਥੀ ਵਜੋਂ ਹੋਏ ਤਜਰਬਿਆਂ, ਬਾਰੇ ਗੱਲ ਕਰ ਚੁੱਕੇ ਹਨ।
Credit : www.jagbani.com
