ਸ਼ਾਹਕੋਟ/ਜਲੰਧਰ-: ਜਲੰਧਰ ਦੇਹਾਤੀ ਪੁਲਸ ਨੇ ਬੀਤੇ ਦਿਨ ਨਸ਼ਾ ਤਸਕਰੀ ਦੀ ਸੂਚਨਾ ਮਿਲਣ ਤੋਂ ਬਾਅਦ ਇੱਕ ਸਵਿਫਟ ਕਾਰ ਚਾਲਕ ਦਾ ਲਗਭਗ 20-22 ਕਿਲੋਮੀਟਰ ਤੱਕ ਪਿੱਛਾ ਕੀਤਾ ਪਰ ਉਹ ਕਾਬੂ ਨਹੀਂ ਆ ਸਕਿਆ। ਪਿੱਛਾ ਕਰਨ ਦੌਰਾਨ ਸਵਿਫਟ ਚਾਲਕ ਨੇ ਦਰਜਨ ਤੋਂ ਵੱਧ ਵਾਹਨਾਂ ਨੂੰ ਟੱਕਰ ਮਾਰੀ ਅਤੇ ਆਖਰਕਾਰ ਸ਼ਾਹਕੋਟ ਪਹੁੰਚ ਕੇ ਆਪਣੀ ਕਾਰ ਛੱਡ ਕੇ ਲੋਕਾਂ ਦੀਆਂ ਛੱਤਾਂ ਟੱਪਦਾ ਹੋਇਆ ਫਰਾਰ ਹੋ ਗਿਆ। ਪੁਲਸ ਨੇ ਮੌਕੇ ਤੋਂ ਭੱਜੇ ਹੋਏ ਨੌਜਵਾਨ ਦੀ ਕਾਰ ਵਿੱਚੋਂ 55 ਗ੍ਰਾਮ ਸਮੈਕ (Smack) ਬਰਾਮਦ ਕੀਤੀ ਹੈ।
ਕਿਵੇਂ ਸ਼ੁਰੂ ਹੋਇਆ ਪਿੱਛਾ?
ਇਸ ਘਟਨਾ ਬਾਰੇ ਜਾਣਕਾਰੀ ਦਿੰਦਿਆਂ ਜਲੰਧਰ ਦੇਹਾਤੀ ਸੀ ਏ ਸਟਾਫ ਦੇ ਅਧਿਕਾਰੀ ਨਿਰਮਲ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇਤਲਾਹ ਮਿਲੀ ਸੀ ਕਿ ਇੱਕ ਨੌਜਵਾਨ ਸਵਿਫਟ ਗੱਡੀ ਵਿੱਚ ਸਵਾਰ ਹੋ ਕੇ ਨਸ਼ਾ ਲੈ ਕੇ ਨਕੋਦਰ ਵੱਲ ਨੂੰ ਜਾ ਰਿਹਾ ਹੈ। ਇਸ ਇਤਲਾਹ 'ਤੇ ਕਾਰਵਾਈ ਕਰਦਿਆਂ ਸੀਏ ਸਟਾਫ ਵੱਲੋਂ ਨਕੋਦਰ ਰੇਲਵੇ ਫਾਟਕਾਂ 'ਤੇ ਨਾਕਾਬੰਦੀ ਕੀਤੀ ਗਈ। ਨਿਰਮਲ ਸਿੰਘ ਨੇ ਦੱਸਿਆ ਕਿ ਸਵਿਫਟ ਚਾਲਕ ਨੇ ਨਾਕਾਬੰਦੀ ਦੇਖਦਿਆਂ ਆਪਣੀ ਕਾਰ ਨੂੰ ਰੋਕਣ ਦੀ ਬਜਾਏ ਨਕੋਦਰ ਤੋਂ ਪੰਡੋਰੀ ਸਾਈਡ ਵੱਲ ਭਜਾ ਲਿਆ। ਪੁਲਸ ਟੀਮ ਲਗਾਤਾਰ ਉਸਦਾ ਪਿੱਛਾ ਕਰਦੀ ਰਹੀ ਅਤੇ ਕਰੀਬ 20 ਤੋਂ 22 ਕਿਲੋਮੀਟਰ ਤੱਕ ਉਸਦੇ ਪਿੱਛੇ ਦੌੜਦੀ ਰਹੀ। ਕਾਰ ਚਾਲਕ ਆਖਰਕਾਰ ਸ਼ਾਹਕੋਟ ਪਹੁੰਚਿਆ ਅਤੇ ਸ਼ਾਹਕੋਟ ਦੇ ਦੁਸਹਿਰਾ ਗਰਾਊਂਡ ਦੇ ਨੇੜਲੇ ਬਾਜ਼ਾਰ ਵਿੱਚ ਹਫੜਾ-ਦਫੜੀ ਦਾ ਮਾਹੌਲ ਬਣ ਗਿਆ ਜਦੋਂ ਕਾਰ ਬੜੀ ਤੇਜ਼ ਰਫ਼ਤਾਰ ਨਾਲ ਗੱਡੀਆਂ ਨੂੰ ਠੋਕਦੀ ਹੋਈ ਬਾਜ਼ਾਰ ਆ ਵੜੀ। ਕਾਰ ਚਾਲਕ ਨੇ ਆਪਣੀ ਗੱਡੀ ਢਡੋਵਾਲ ਰੋਡ 'ਤੇ ਖੜ੍ਹੀ ਕਰ ਦਿੱਤੀ ਅਤੇ ਖੁਦ ਗੱਡੀ ਦੀ ਛੱਤ 'ਤੇ ਚੜ੍ਹ ਗਿਆ। ਮੌਕੇ ਦੇ ਗਵਾਹਾਂ ਮੁਤਾਬਕ, ਉਹ ਨੌਜਵਾਨ ਕਾਰ ਦੀ ਛੱਤ ਤੋਂ ਨੇੜਲੀ ਦੁਕਾਨ ਦੀ ਛੱਤ 'ਤੇ ਜਾ ਚੜ੍ਹਿਆ ਅਤੇ ਵੇਖਦੇ ਹੀ ਵੇਖਦੇ ਮੌਕੇ ਤੋਂ ਰਫੂ ਚੱਕਰ ਹੋ ਗਿਆ।
ਦਰਜਨ ਤੋਂ ਵੱਧ ਵਾਹਨਾਂ ਨੂੰ ਮਾਰੀ ਟੱਕਰ
ਪੁਲਸ ਅਧਿਕਾਰੀ ਨਿਰਮਲ ਸਿੰਘ ਨੇ ਦੱਸਿਆ ਕਿ 20-22 ਕਿਲੋਮੀਟਰ ਪਿੱਛਾ ਕੀਤੇ ਜਾਣ ਦੌਰਾਨ ਸਵਿਫਟ ਕਾਰ ਚਾਲਕ ਨੇ ਜੋ ਵੀ ਅੱਗੇ ਆਇਆ ਉਸ ਨੂੰ ਟੱਕਰ ਮਾਰ ਦਿੱਤੀ। ਦੱਸਿਆ ਜਾ ਰਿਹਾ ਹੈ ਕਿ ਕਾਰ ਚਾਲਕ ਨੇ ਦਰਜਨ ਤੋਂ ਵੀ ਵੱਧ ਵਾਹਨਾਂ ਨੂੰ ਟੱਕਰ ਮਾਰੀ। ਅਧਿਕਾਰੀ ਨੇ ਅੱਗੇ ਦੱਸਿਆ ਕਿ ਫਿਲਹਾਲ ਉਨ੍ਹਾਂ ਨੂੰ ਕਿਸੇ ਵੀ ਵਾਹਨ ਚਾਲਕ ਦੀ ਕੋਈ ਸ਼ਿਕਾਇਤ ਨਹੀਂ ਮਿਲੀ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਜੇਕਰ ਕੋਈ ਸ਼ਿਕਾਇਤ ਮਿਲਦੀ ਹੈ ਤਾਂ ਕਾਰਵਾਈ ਜ਼ਰੂਰ ਕੀਤੀ ਜਾਵੇਗੀ।
ਡਰਾਈਵਰ ਦੀ ਹੋਈ ਪਹਿਚਾਣ
ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ਭੱਜੇ ਹੋਏ ਗੱਡੀ ਚਾਲਕ ਦੀ ਪਹਿਚਾਣ ਹਰਮਹੇਸ਼ ਸਿੰਘ ਵਾਸੀ ਪਿੰਡ ਬੂਟ ਸੁਭਾਨਪੁਰ ਵੱਜੋਂ ਹੋਈ ਹੈ। ਪੁਲਸ ਨੇ ਗੱਡੀ ਨੂੰ ਜ਼ਬਤ ਕਰ ਲਿਆ ਹੈ ਅਤੇ ਅਗਲੇਰੀ ਕਾਰਵਾਈ ਜਾਰੀ ਹੈ।
Credit : www.jagbani.com
