ਨਵੀਂ ਦਿੱਲੀ : ਜੇਕਰ ਤੁਸੀਂ ਆਉਣ ਵਾਲੇ ਮਹੀਨਿਆਂ ਵਿੱਚ ਹਵਾਈ ਸਫਰ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਇਹ ਖ਼ਬਰ ਤੁਹਾਡੇ ਲਈ ਬੇਹੱਦ ਅਹਿਮ ਹੈ। ਰਨਵੇਅ ਦੀ ਮੁਰੰਮਤ ਕਾਰਨ ਦੇਸ਼ ਦੇ ਚਾਰ ਪ੍ਰਮੁੱਖ ਹਵਾਈ ਅੱਡਿਆਂ— ਜੋਧਪੁਰ, ਸ਼੍ਰੀਨਗਰ, ਪੁਣੇ ਅਤੇ ਪੰਜਾਬ ਦੇ ਆਦਮਪੁਰ ਏਅਰ ਬੇਸ 'ਤੇ ਉਡਾਣਾਂ ਅਸਥਾਈ ਤੌਰ 'ਤੇ ਪ੍ਰਭਾਵਿਤ ਰਹਿਣਗੀਆਂ। ਭਾਰਤੀ ਹਵਾਈ ਸੈਨਾ (IAF) ਵੱਲੋਂ ਇਨ੍ਹਾਂ ਹਵਾਈ ਅੱਡਿਆਂ 'ਤੇ ਪੜਾਅਵਾਰ ਰਨਵੇਅ ਰੀਕਾਰਪੇਟਿੰਗ (Recarpeting) ਦੀ ਯੋਜਨਾ ਬਣਾਈ ਗਈ ਹੈ।
ਆਦਮਪੁਰ ਏਅਰਪੋਰਟ 'ਤੇ ਸਭ ਤੋਂ ਲੰਬੀ ਬੰਦੀ
ਪੰਜਾਬ ਦੇ ਯਾਤਰੀਆਂ ਲਈ ਚਿੰਤਾ ਵਾਲੀ ਗੱਲ ਇਹ ਹੈ ਕਿ ਜਲੰਧਰ ਨੇੜਲੇ ਆਦਮਪੁਰ ਏਅਰ ਬੇਸ 'ਤੇ ਸਾਲ ਦੇ ਅੰਤ ਤੱਕ ਲਗਭਗ 8 ਮਹੀਨਿਆਂ ਲਈ ਉਡਾਣਾਂ ਬੰਦ ਰਹਿਣ ਦੀ ਸੰਭਾਵਨਾ ਹੈ। ਇਹ ਇਨ੍ਹਾਂ ਚਾਰਾਂ ਹਵਾਈ ਅੱਡਿਆਂ ਵਿੱਚੋਂ ਸਭ ਤੋਂ ਲੰਬੀ ਮਿਆਦ ਦੀ ਬੰਦੀ ਹੋਵੇਗੀ।
ਜੋਧਪੁਰ ਅਤੇ ਸ਼੍ਰੀਨਗਰ ਦਾ ਸ਼ਡਿਊਲ
ਜੋਧਪੁਰ ਏਅਰਪੋਰਟ: ਇੱਥੇ ਉਡਾਣਾਂ ਦਾ ਸੰਚਾਲਨ 29 ਮਾਰਚ ਤੋਂ 27 ਅਪ੍ਰੈਲ ਤੱਕ ਪੂਰੀ ਤਰ੍ਹਾਂ ਬੰਦ ਰਹੇਗਾ। ਇੰਡੀਗੋ ਅਤੇ ਏਅਰ ਇੰਡੀਆ ਵਰਗੀਆਂ ਕੰਪਨੀਆਂ ਨੇ 28 ਮਾਰਚ ਤੋਂ ਬਾਅਦ ਦੀਆਂ ਬੁਕਿੰਗਾਂ ਪਹਿਲਾਂ ਹੀ ਰੋਕ ਦਿੱਤੀਆਂ ਹਨ।
ਸ਼੍ਰੀਨਗਰ ਏਅਰਪੋਰਟ: ਅਗਸਤ ਤੋਂ ਅਕਤੂਬਰ ਦੇ ਅੱਧ ਤੱਕ ਹਰ ਹਫ਼ਤੇ ਦੇ ਅੰਤ (Weekend) 'ਤੇ ਉਡਾਣਾਂ ਪ੍ਰਭਾਵਿਤ ਰਹਿਣਗੀਆਂ। ਇਸ ਤੋਂ ਬਾਅਦ 16 ਅਕਤੂਬਰ ਤੋਂ 5 ਨਵੰਬਰ ਤੱਕ ਹਵਾਈ ਅੱਡਾ ਪੂਰੀ ਤਰ੍ਹਾਂ ਬੰਦ ਰਹੇਗਾ।
ਪੁਣੇ ਏਅਰਪੋਰਟ: ਇੱਥੇ ਵੀ ਰਨਵੇਅ ਮੁਰੰਮਤ ਦੀ ਯੋਜਨਾ ਹੈ, ਪਰ ਇਸ ਦੀਆਂ ਤਰੀਕਾਂ ਦਾ ਅਧਿਕਾਰਤ ਐਲਾਨ ਹੋਣਾ ਅਜੇ ਬਾਕੀ ਹੈ।
ਕਿਉਂ ਲਿਆ ਗਿਆ ਇਹ ਫੈਸਲਾ?
ਇਹ ਹਵਾਈ ਅੱਡੇ ਨਾ ਸਿਰਫ਼ ਨਾਗਰਿਕ ਉਡਾਣਾਂ ਲਈ ਵਰਤੇ ਜਾਂਦੇ ਹਨ, ਸਗੋਂ ਫੌਜੀ ਪੱਖੋਂ ਵੀ ਬਹੁਤ ਮਹੱਤਵਪੂਰਨ ਹਨ। ਰੱਖਿਆ ਉਡਾਣਾਂ ਅਤੇ ਫਾਈਟਰ ਜੈੱਟਸ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਰਨਵੇਅ ਨੂੰ ਉੱਚ ਤਕਨੀਕੀ ਮਾਪਦੰਡਾਂ ਅਨੁਸਾਰ ਬਣਾਈ ਰੱਖਣਾ ਜ਼ਰੂਰੀ ਹੁੰਦਾ ਹੈ।
ਯਾਤਰੀਆਂ ਲਈ ਸਲਾਹ
ਸਰਕਾਰ ਨੇ ਉਡਾਣਾਂ ਵਿੱਚ ਕਟੌਤੀ ਅਤੇ ਰੂਟ ਬਦਲਣ ਦੇ ਮੱਦੇਨਜ਼ਰ ਪਹਿਲਾਂ ਹੀ 'ਮ' (NOTAMs) ਜਾਰੀ ਕਰ ਦਿੱਤੇ ਹਨ। ਯਾਤਰੀਆਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਕਿਸੇ ਵੀ ਪ੍ਰੇਸ਼ਾਨੀ ਤੋਂ ਬਚਣ ਲਈ ਹਵਾਈ ਅੱਡੇ ਜਾਣ ਤੋਂ ਪਹਿਲਾਂ ਆਪਣੀ ਫਲਾਈਟ ਦਾ ਸਟੇਟਸ (Flight Status) ਜ਼ਰੂਰ ਚੈੱਕ ਕਰ ਲੈਣ।
Credit : www.jagbani.com
