ਇੰਟਰਨੈਸ਼ਨਲ ਡੈਸਕ- ਇਰਾਨ ਅਤੇ ਅਮਰੀਕਾ-ਇਜ਼ਰਾਈਲ ਵਿਚਾਲੇ ਜਾਰੀ ਜੰਗ ਹੁਣ ਸਿਰਫ਼ ਫ਼ੌਜੀ ਜੰਗ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਇਹ ਇੱਕ ਅਜਿਹੇ ਗਲੋਬਲ ਆਰਥਿਕ ਸੰਕਟ ਵੱਲ ਵਧ ਰਹੀ ਹੈ ਜੋ ਦੁਨੀਆ ਦਾ ਨਕਸ਼ਾ ਬਦਲ ਸਕਦੀ ਹੈ। ਮਾਹਿਰਾਂ ਅਨੁਸਾਰ, ਇਹ ਜੰਗ ਯੂਕ੍ਰੇਨ ਵਾਂਗ ਲੰਬੀ ਖਿੱਚੀ ਜਾਵੇਗੀ, ਜਿਸ ਦਾ ਸਿੱਧਾ ਅਸਰ ਹਰ ਆਮ ਇਨਸਾਨ ਦੀ ਜੇਬ ਅਤੇ ਰਸੋਈ 'ਤੇ ਪਵੇਗਾ।
ਰਣਨੀਤਕ ਮਾਹਿਰਾਂ ਦੀ ਚਿਤਾਵਨੀ ਹੈ ਕਿ ਇਰਾਨ ਇਸ ਜੰਗ ਨੂੰ ਜਲਦੀ ਖ਼ਤਮ ਨਹੀਂ ਕਰੇਗਾ। ਜਿਵੇਂ-ਜਿਵੇਂ ਜੰਗ ਦਾ ਦਾਇਰਾ ਵਧੇਗਾ, ਕੱਚੇ ਤੇਲ ਦੀਆਂ ਕੀਮਤਾਂ 200 ਡਾਲਰ ਪ੍ਰਤੀ ਬੈਰਲ ਦੇ ਅੰਕੜੇ ਨੂੰ ਪਾਰ ਕਰ ਸਕਦੀਆਂ ਹਨ। ਤੇਲ ਮਹਿੰਗਾ ਹੋਣ ਨਾਲ ਮਾਲ-ਢੋਆਈ ਦੀ ਲਾਗਤ ਵਧੇਗੀ, ਜਿਸ ਕਾਰਨ ਪੂਰੀ ਦੁਨੀਆ ਵਿੱਚ ਭੋਜਨ ਦੀ ਭਾਰੀ ਕਿੱਲਤ ਅਤੇ ਮਹਿੰਗਾਈ ਪੈਦਾ ਹੋ ਸਕਦੀ ਹੈ।
ਅਮਰੀਕਾ ਇਸ ਸਮੇਂ ਅਜਿਹੀ ਜੰਗ ਵਿੱਚ ਫਸ ਗਿਆ ਹੈ ਜਿੱਥੋਂ ਨਿਕਲਣਾ ਉਸ ਲਈ ਆਸਾਨ ਨਹੀਂ ਹੈ। ਜੇਕਰ ਅਮਰੀਕਾ ਜੰਗ ਰੋਕਣਾ ਚਾਹੁੰਦਾ ਹੈ, ਤਾਂ ਇਰਾਨ ਆਪਣੇ ਨੁਕਸਾਨ ਦੇ ਮੁਆਵਜ਼ੇ ਅਤੇ ਅਮਰੀਕੀ ਫ਼ੌਜਾਂ ਦੀ ਮੱਧ-ਪੂਰਬ ਵਿੱਚੋਂ ਮੁਕੰਮਲ ਵਾਪਸੀ ਦੀ ਮੰਗ 'ਤੇ ਅੜਿਆ ਹੋਇਆ ਹੈ। ਅਰਬਾਂ ਡਾਲਰ ਦਾ ਮੁਆਵਜ਼ਾ ਦੇਣਾ ਅਮਰੀਕਾ ਲਈ ਇੱਕ ਵੱਡੀ ਸਿਆਸੀ ਅਤੇ ਆਰਥਿਕ ਹਾਰ ਹੋਵੇਗੀ।
