ਬੰਗਾ- ਬੰਗਾ ਫਗਵਾੜਾ ਮੁੱਖ ਮਾਰਗ 'ਤੇ ਕਸਬਾ ਬਹਿਰਾਮ ਵਿਖੇ ਲੱਗੇ ਨੈਸ਼ਨਲ ਟੋਲ ਪਲਾਜ਼ਾ 'ਤੇ ਬੀਤੀ ਦੇਰ ਰਾਤ ਟੱਰਕ ਨਾਲ ਹੋਏ ਹਾਦਸੇ ਵਿੱਚ ਇਕ 32 ਸਾਲਾ ਟੋਲ ਕਰਮਚਾਰੀ ਦੀ ਮੌਕੇ 'ਤੇ ਮੌਤ ਹੋ ਗਈ। ਮੌਕੇ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਇਕ ਟੱਰਕ ਨੰਬਰ ਪੀ. ਬੀ. 10 ਸੀ. ਐੱਲ. 6325 ਜੋਕਿ ਫਗਵਾੜਾ ਵੱਲੋਂ ਬੰਗਾ ਵੱਲ ਨੂੰ ਆ ਰਿਹਾ ਸੀ। ਜਿਵੇਂ ਹੀ ਉਕਤ ਟਰੱਕ ਦਾ ਚਾਲਕ ਟੱਰਕ ਨੂੰ ਲੈ ਕੇ ਉਕਤ ਲੱਗੇ ਟੋਲ ਪਲਾਜ਼ਾ 'ਤੇ ਪੁੱਜਾ ਤਾਂ ਟੋਲ ਬੈਰੀਅਰ ਤੋਂ ਬਿਨਾਂ ਟੋਲ ਪਲਾਜ਼ਾ ਕਟਵਾਏ ਹੋਏ ਜਦੋਂ ਟੋਲ ਤੋਂ ਜ਼ਬਰਦਸਤੀ ਲੰਘਣ ਲੱਗਾ ਤਾ ਉੱਥੇ ਹਾਜ਼ਰ ਟੋਲ ਕਰਮਚਾਰੀ ਸ਼ੁਸੀਲ ਕੁਮਾਰ ਬੰਗੜ ਉਰਫ ਬਿੱਲਾ (32)ਸਾਲ ਪੁੱਤਰ ਰੋਣਕੀ ਰਾਮ ਨਿਵਾਸੀ ਬੰਗਾ ਨੂੰ ਟਰੱਕ ਹੇਠਾਂ ਦੇ ਕੇ ਟੋਲ ਬੈਰੀਅਰ 'ਤੇ ਲੱਗੇ ਭੂਮ ਨੂੰ ਤੋੜਦਾ ਹੋਇਆ ਮੌਕੇ ਤੋਂ ਟੱਰਕ ਸਮੇਤ ਫਰਾਰ ਹੋ ਗਿਆ।
ਇਸ ਦੌਰਾਨ ਟੱਰਕ ਹੇਠਾਂ ਆਉਣ ਵਾਲੇ ਕਰਮਚਾਰੀ ਨੇ ਮੌਕੇ ਉਤੇ ਹੀ ਦਮ ਤੋੜ ਦਿੱਤਾ। ਹਾਦਸੇ ਦੀ ਸੂਚਨਾ ਟੋਲ ਕੰਪਨੀ ਅਤੇ ਮੈਨੇਜਰ ਕੈਲਾਸ਼ ਕੁਮਾਰ ਦੁਆਰਾ ਬਹਿਰਾਮ ਪੁਲਸ ਨੂੰ ਦਿੱਤੀ, ਜੋਕਿ ਸੂਚਨਾ ਮਿਲਦੇ ਹੀ ਤੁਰੰਤ ਮੌਕੇ 'ਤੇ ਪੁੱਜੀ। ਮ੍ਰਿਤਕ ਸ਼ੁਸੀਲ ਕੁਮਾਰ ਦੀ ਮ੍ਰਿਤਕ ਦੇਹ ਨੂੰ ਕਬਜ਼ੇ ਵਿੱਚ ਲੈ ਕੇ ਸੀ. ਸੀ. ਟੀ. ਵੀ. ਵਿੱਚ ਕੈਦ ਹੋਏ ਹਾਦਸੇ ਨੂੰ ਵੇਖ ਆਪਣੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਬਹਿਰਾਮ ਪੁਲਸ ਵੱਲੋਂ ਵਰਤੀ ਮੁਸਤੈਦੀ ਅਤੇ ਤੁਰੰਤ ਕੀਤੀ ਕਾਰਵਾਈ ਦੌਰਾਨ ਮੌਕੇ ਤੋਂ ਫਰਾਰ ਹੋਇਆ ਟੱਰਕ ਚਾਲਕ ਨੂੰ ਪੁਲਸ ਨੇ ਸਮੇਤ ਟੱਰਕ ਰੂਪਨਗਰ ਨੇੜਿਓਂ ਗ੍ਰਿਫ਼ਤਾਰ ਕਰ ਲਿਆ ਅਤੇ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਪਰਿਵਾਰਕ ਮੈਂਬਰਾ ਨੇ ਹਾਦਸੇ ਵਿੱਚ ਮਾਰੇ ਗਏ ਸ਼ੁਸੀਲ ਕੁਮਾਰ ਦੀਆਂ ਅੱਖਾਂ ਨੂੰ ਕੀਤਾ ਦਾਨ
ਦੇਰ ਰਾਤ ਹੋਏ ਹਾਦਸੇ ਵਿੱਚ ਮਾਰੇ ਗਏ 32 ਸਾਲਾ ਨੌਜਵਾਨ ਸ਼ੁਸੀਲ ਕੁਮਾਰ ਦੇ ਪਰਿਵਾਰਕ ਮੈਂਬਰ ਉਸ ਦੇ ਪਿਤਾ ਰੋਣਕੀ ਰਾਮ ਅਤੇ ਮਾਮਾ ਰਾਜ ਪਾਲ ਨੇ ਦੱਸਿਆ ਕਿ ਸਮੂਹ ਪਰਿਵਾਰ ਨੇ ਫ਼ੈਸਲਾ ਕੀਤਾ ਹੈ ਕਿ ਬੇਸ਼ਕ ਉਨ੍ਹਾਂ ਦਾ ਬੇਟਾ ਸ਼ੁਸੀਲ ਕੁਮਾਰ ਇਸ ਦੁਨਿਆ ਵਿੱਚ ਨਹੀਂ ਰਿਹਾ ਪਰ ਅਸੀਂ ਉਸ ਦੀਆਂ ਅੱਖਾਂ ਨੂੰ ਲੋੜਵੰਦ ਵਿਅਕਤੀਆਂ ਨੂੰ ਦਾਨ ਦੇ ਕੇ ਉਨਾਂ ਦੀ ਜ਼ਿੰਦਗੀ ਵਿੱਚੋਂ ਹਨੇਰਾ ਦੁਰ ਕਰਨ ਦਾ ਯਤਨ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਆਪਣੇ ਬੇਟੇ ਦੀਆਂ ਅੱਖਾਂ ਨੇਤਰ ਦਾਨ ਸੰਸਥਾ ਦੇ ਸਹਿਯੋਗ ਨਾਲ ਲੋੜਵੰਦ ਵਿਅਕਤੀ ਨੂੰ ਦਾਨ ਦੇ ਦੇਣਗੇ।
ਜਗ ਬਾਣੀ ਈ-ਪੇਪਰ ਪੜ੍ਹਨ ਅਤੇ ਐਪ ਡਾਊਨਲੋਡ ਕਰਨ ਲਈ ਹੇਠਾਂ ਦਿੱਤੇ ਲਿੰਕ ’ਤੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Credit : www.jagbani.com
