ਇੰਟਰਨੈਸ਼ਨਲ ਡੈਸਕ: ਅਕਸਰ ਅਸੀਂ ਜਨਮਦਿਨ ਜਾਂ ਪਾਰਟੀਆਂ 'ਤੇ ਰੰਗ-ਬਿਰੰਗੇ ਗੁਬਾਰਿਆਂ ਨਾਲ ਖੇਡਦੇ ਹਾਂ ਅਤੇ ਕਈ ਵਾਰ ਬੱਚੇ ਅਤੇ ਨੌਜਵਾਨ ਮੌਜ-ਮਸਤੀ ਲਈ ਉਨ੍ਹਾਂ ਵਿੱਚ ਭਰੀ ਗੈਸ ਨੂੰ ਸਾਹ ਰਾਹੀਂ ਅੰਦਰ ਖਿੱਚ ਲੈਂਦੇ ਹਨ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਅਜਿਹਾ ਕਰਨਾ ਤੁਹਾਡੀ ਜ਼ਿੰਦਗੀ ਲਈ ਬਹੁਤ ਖ਼ਤਰਨਾਕ ਸਾਬਤ ਹੋ ਸਕਦਾ ਹੈ? ਇਸੇ ਤਰ੍ਹਾਂ ਦੇ ਹਾਦਸੇ ਨਾਲ ਸਬੰਧਤ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਹੈ। ਵੀਡੀਓ ਵਿੱਚ ਦੇਖਿਆ ਜਾ ਸਕਦਾ ਹੈ ਕਿ ਕਾਰ ਵਿੱਚ ਬੈਠੀ ਇੱਕ ਕੁੜੀ ਮਜ਼ਾਕ ਕਰਦੇ ਹੋਏ ਆਪਣੇ ਮੂੰਹ ਵਿੱਚ ਗੁਬਾਰੇ ਦੀ ਗੈਸ ਖਿੱਚ ਲੈਂਦੀ ਹੈ ਅਤੇ ਕੁਝ ਸਕਿੰਟਾਂ ਵਿੱਚ ਹੀ ਉਸਦੀ ਜਾਨ ਖ਼ਤਰੇ ਵਿਚ ਪੈ ਜਾਂਦੀ ਹੈ। ਕਾਰ ਵਿੱਚ ਬੈਠੀ ਬੱਚੀ ਅਤੇ ਉਸਦਾ ਪਿਤਾ ਉਸਦੀ ਹਾਲਤ ਦੇਖ ਕੇ ਡਰ ਜਾਂਦੇ ਹਨ ਅਤੇ ਉਸਨੂੰ ਹੋਸ਼ ਵਿੱਚ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਕਰਦੇ ਹਨ। ਇਸ ਵੀਡੀਓ ਦੇ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਣ ਤੋਂ ਬਾਅਦ, ਲੋਕਾਂ ਨੂੰ ਜਾਨ ਖਤਰੇ ਵਿਚ ਪਾਉਣ ਵਾਲੇ ਮਜ਼ਾਕ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ।
ਹੀਲੀਅਮ ਗੈਸ ਸਰੀਰ 'ਚ ਆਕਸੀਜਨ ਨੂੰ ਤੁਰੰਤ ਕਰੇ ਰਿਪਲੇਸ
ਮਾਹਿਰਾਂ ਦੇ ਅਨੁਸਾਰ, ਜਦੋਂ ਕੋਈ ਵਿਅਕਤੀ ਹੀਲੀਅਮ ਗੈਸ ਆਪਣੇ ਅੰਦਰ ਖਿੱਚ ਲੈਂਦਾ ਹੈ, ਤਾਂ ਇਹ ਸਾਡੇ ਸਰੀਰ ਵਿੱਚ ਮੌਜੂਦ ਆਕਸੀਜਨ ਨੂੰ ਤੁਰੰਤ ਰਿਪਲੇਸ ਕਰ ਦਿੰਦੀ ਹੈ। ਯਾਨੀ ਕਿ ਸਾਡੇ ਦਿਮਾਗ ਅਤੇ ਦਿਲ ਨੂੰ ਆਕਸੀਜਨ ਦੀ ਸਪਲਾਈ ਅਚਾਨਕ ਬੰਦ ਹੋ ਜਾਂਦੀ ਹੈ। ਨਤੀਜਾ ਇਹ ਹੁੰਦਾ ਹੈ ਕਿ ਵਿਅਕਤੀ ਕੁਝ ਸਕਿੰਟਾਂ ਵਿੱਚ ਬੇਹੋਸ਼ ਹੋ ਸਕਦਾ ਹੈ ਅਤੇ ਕਈ ਮਾਮਲਿਆਂ ਵਿੱਚ ਮਰ ਵੀ ਸਕਦਾ ਹੈ। ਹੀਲੀਅਮ ਇੱਕ ਰੰਗਹੀਣ ਅਤੇ ਗੰਧਹੀਣ ਗੈਸ ਹੈ। ਇਹ ਪਹਿਲਾਂ ਨੁਕਸਾਨਦੇਹ ਨਹੀਂ ਲੱਗਦੀ, ਪਰ ਇਹ ਹੌਲੀ-ਹੌਲੀ ਫੇਫੜਿਆਂ ਅਤੇ ਖੂਨ ਵਿੱਚੋਂ ਆਕਸੀਜਨ ਕੱਢ ਦਿੰਦੀ ਹੈ। ਜੇਕਰ ਦਿਮਾਗ ਨੂੰ ਆਕਸੀਜਨ ਨਹੀਂ ਮਿਲਦੀ, ਤਾਂ ਬਰੇਨ ਡੈਮੇਜ, ਬੇਹੋਸ਼ੀ ਅਤੇ ਇੱਥੋਂ ਤੱਕ ਕਿ ਮੌਤ ਦਾ ਖ਼ਤਰਾ ਹੁੰਦਾ ਹੈ।
