ਇੰਟਰਨੈਸ਼ਨਲ ਡੈਸਕ- ਇਰਾਨ ਜੰਗ ਦੌਰਾਨ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਮਰੀਕੀ ਐੱਫ-15 ਜੈੱਟ ਡਿੱਗਣ ਤੋਂ ਬਾਅਦ ਭੜਕ ਗਏ ਸਨ। ਉਹ ਕਈ ਘੰਟਿਆਂ ਤੱਕ ਅਧਿਕਾਰੀਆਂ ’ਤੇ ਚੀਕਦੇ-ਚਿਲਾਉਂਦੇ ਰਹੇ। ‘ਦਿ ਵਾਲ ਸਟ੍ਰੀਟ ਜਰਨਲ’ ਦੀ ਰਿਪੋਰਟ ਮੁਤਾਬਕ, ਇਸੇ ਵਜ੍ਹਾ ਕਰ ਕੇ ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਵਾਰ ਰੂਮ ਦੀ ਅਹਿਮ ਬ੍ਰੀਫਿੰਗਜ਼ ਤੋਂ ਦੂਰ ਰੱਖਿਆ। ਹਾਲਾਂਕਿ, ਵ੍ਹਾਈਟ ਹਾਊਸ ਨੇ ਇਸ ਰਿਪੋਰਟ ਨੂੰ ਖਾਰਜ ਕੀਤਾ ਹੈ।
ਜ਼ਿਕਰਯੋਗ ਹੈ ਕਿ 3 ਅਪ੍ਰੈਲ ਨੂੰ ਇਰਾਨ ਦੇ ਉੱਪਰ ਅਮਰੀਕੀ ਐੱਫ-15 ਜੈੱਟ ਡਿੱਗਣ ਤੋਂ ਬਾਅਦ 2 ਏਅਰਮੈਨ ਲਾਪਤਾ ਹੋ ਗਏ ਸਨ, ਜਿਨ੍ਹਾਂ 'ਚੋਂ ਇਕ ਨੂੰ ਤੁਰੰਤ ਬਚਾ ਲਿਆ ਗਿਆ ਸੀ, ਪਰ ਦੂਜਾ 24 ਘੰਟਿਆਂ ਤੋਂ ਵੱਧ ਸਮੇਂ ਤੱਕ ਦੁਸ਼ਮਣ ਦੇ ਇਲਾਕੇ ’ਚ ਫਸਿਆ ਰਿਹਾ। ਰਿਪੋਰਟ ’ਚ ਸੀਨੀਅਰ ਅਧਿਕਾਰੀਆਂ ਦੇ ਹਵਾਲੇ ਨਾਲ ਦੱਸਿਆ ਗਿਆ ਹੈ ਕਿ ਟਰੰਪ ਨੂੰ ਸਥਿਤੀ ਦੀ ਜਾਣਕਾਰੀ ਸਿਰਫ ਜ਼ਰੂਰੀ ਮੌਕਿਆਂ ’ਤੇ ਫ਼ੋਨ ਰਾਹੀਂ ਦਿੱਤੀ ਜਾ ਰਹੀ ਸੀ। ਉਨ੍ਹਾਂ ਨੂੰ ਰੀਅਲ-ਟਾਈਮ ਆਪ੍ਰੇਸ਼ਨ ਵਾਲੀਆਂ ਬੈਠਕਾਂ ’ਚ ਸ਼ਾਮਲ ਨਹੀਂ ਕੀਤਾ ਗਿਆ, ਕਿਉਂਕਿ ਅਧਿਕਾਰੀਆਂ ਨੂੰ ਲੱਗਿਆ ਕਿ ਉਨ੍ਹਾਂ ਦੀ ਬੇਸਬਰੀ ਦਾ ਅਸਰ ਫ਼ੈਸਲਿਆਂ ’ਤੇ ਪੈ ਸਕਦਾ ਹੈ।
ਟਰੰਪ ਰੈਸਕਿਊ ਵੇਲੇ ਸਿਚੁਏਸ਼ਨ ਰੂਮ ’ਚ ਨਹੀਂ ਸਨ
ਏਅਰਮੈਨ ਦੇ ਰੈਸਕਿਊ ਆਪ੍ਰੇਸ਼ਨ ਦੌਰਾਨ ਉਪ-ਰਾਸ਼ਟਰਪਤੀ ਜੇ.ਡੀ. ਵੈਂਸ ਅਤੇ ਚੀਫ਼ ਆਫ਼ ਸਟਾਫ਼ ਸੂਸੀ ਵਾਈਲਸ ਸਮੇਤ ਕਈ ਅਧਿਕਾਰੀ ਸਿਚੁਏਸ਼ਨ ਰੂਮ ਤੋਂ ਲਗਾਤਾਰ ਅਪਡੇਟ ਲੈ ਰਹੇ ਸਨ। ਇਹ ਬੈਠਕਾਂ ਅਗਲੇ 24 ਘੰਟਿਆਂ ਤੱਕ ਚੱਲੀਆਂ ਪਰ ਟਰੰਪ ਇਨ੍ਹਾਂ ’ਚ ਸ਼ਾਮਲ ਨਹੀਂ ਸਨ।
ਰਿਪੋਰਟ ’ਚ ਕਿਹਾ ਗਿਆ ਕਿ ਟਰੰਪ ਇਸ ਸਥਿਤੀ ਦੀ ਤੁਲਨਾ ਇਰਾਨ ਬੰਧਕ ਸੰਕਟ ਨਾਲ ਕਰ ਰਹੇ ਸਨ, ਜਿਸ ’ਚ ਤਤਕਾਲੀ ਰਾਸ਼ਟਰਪਤੀ ਨੂੰ ਚੋਣਾਂ ’ਚ ਭਾਰੀ ਨੁਕਸਾਨ ਉਠਾਉਣਾ ਪਿਆ ਸੀ। ਇਹ ਘਟਨਾ ਉਨ੍ਹਾਂ ਦੇ ਦਿਮਾਗ ’ਚ ਲਗਾਤਾਰ ਚੱਲ ਰਹੀ ਸੀ ਅਤੇ ਜਿਵੇਂ-ਜਿਵੇਂ ਆਪ੍ਰੇਸ਼ਨ ਅੱਗੇ ਵਧਿਆ, ਉਨ੍ਹਾਂ ਦੀ ਚਿੰਤਾ ਵੀ ਵਧਦੀ ਗਈ।
ਅਗਲੇ ਹੀ ਦਿਨ ਟਰੰਪ ਨੇ ਗਾਲੀਆਂ ਭਰੀ ਪੋਸਟ ਕੀਤੀ
ਰੈਸਕਿਊ ਆਪ੍ਰੇਸ਼ਨ ਤੋਂ ਬਾਅਦ ਟਰੰਪ ਨੇ ਅਗਲੇ ਹੀ ਦਿਨ ਸੋਸ਼ਲ ਮੀਡੀਆ ’ਤੇ ਇਰਾਨ ਨੂੰ ਚਿਤਾਵਨੀ ਦਿੱਤੀ। ਉਨ੍ਹਾਂ ‘ਸਟ੍ਰੇਟ ਆਫ਼ ਹੋਰਮੁਜ਼’ ਨੂੰ ਖੋਲ੍ਹਣ ਨੂੰ ਲੈ ਕੇ ਗਾਲੀਆਂ ਭਰਿਆ ਸੰਦੇਸ਼ ਪੋਸਟ ਕੀਤਾ। ਰਿਪੋਰਟ ’ਚ ਕਿਹਾ ਗਿਆ ਕਿ ਟਰੰਪ ਨੇ ਜਾਣਬੁੱਝ ਕੇ ਸੰਦੇਸ਼ ’ਚ ਧਾਰਮਿਕ ਭਾਸ਼ਾ ਅਤੇ ‘ਅੱਲ੍ਹਾ’ ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੀ, ਤਾਂ ਜੋ ਇਰਾਨ ਦੇ ਨੇਤਾਵਾਂ ਨੂੰ ਅਸਹਿਜ ਕੀਤਾ ਜਾ ਸਕੇ। 7 ਅਪ੍ਰੈਲ ਨੂੰ ਉਨ੍ਹਾਂ ਹੋਰ ਸਖ਼ਤ ਬਿਆਨ ਦਿੱਤਾ ਕਿ ਜੇਕਰ ਅਜਿਹਾ ਨਾ ਹੋਇਆ ਤਾਂ ਪੂਰੀ ਸੱਭਿਅਤਾ ਖ਼ਤਮ ਹੋ ਸਕਦੀ ਹੈ। ਹਾਲਾਂਕਿ, ਕੁਝ ਘੰਟਿਆਂ ਬਾਅਦ ਉਨ੍ਹਾਂ 8 ਅਪ੍ਰੈਲ ਤੋਂ 2 ਹਫ਼ਤਿਆਂ ਦੇ ਜੰਗਬੰਦੀ ਦਾ ਐਲਾਨ ਵੀ ਕੀਤਾ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
Credit : www.jagbani.com
