ਨਵੀਂ ਦਿੱਲੀ- ਭਾਰਤ ਨੇ ਅਮਰੀਕਾ ਨੂੰ ਸਾਫ਼ ਕਰ ਦਿੱਤਾ ਹੈ ਕਿ ਉਹ ਮਹਿੰਗੇ ਅਤੇ ਉੱਚ ਤਕਨਾਲੋਜੀ ਵਾਲੇ F-35 ਸਟੀਲਥ ਜੈੱਟ ਲੜਾਕੂ ਜਹਾਜ਼ ਨਹੀਂ ਖਰੀਦਣਾ ਚਾਹੁੰਦਾ। ਸੂਤਰਾਂ ਮੁਤਾਬਕ, ਫਰਵਰੀ 'ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਵ੍ਹਾਈਟ ਹਾਊਸ ਯਾਤਰਾ ਦੌਰਾਨ ਡੋਨਾਲਡ ਟਰੰਪ ਵੱਲੋਂ ਇਹ ਜਹਾਜ਼ ਵੇਚਣ ਦੀ ਪੇਸ਼ਕਸ਼ ਕੀਤੀ ਗਈ ਸੀ ਪਰ ਭਾਰਤ ਨੇ ਆਪਣੀ ਰੁਚੀ ਸਾਂਝੀ ਉਤਪਾਦਨ ਅਤੇ ਰੱਖ-ਰਖਾਵ ਵਿੱਚ ਦਿਖਾਈ ਹੈ ਨਾ ਕਿ ਤਿਆਰ ਉਤਪਾਦ ਖਰੀਦਣ ਵਿੱਚ। ਅਜਿਹਾ ਦਾਅਵਾ ਬਲੂਮਬਰਗ ਦੀ ਰਿਪੋਰਟ ਵਿਚ ਕੀਤਾ ਗਿਆ ਹੈ।
ਦੱਸ ਦੇਈਏ ਕਿ ਹਾਲ ਹੀ 'ਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਭਾਰਤ ਤੋਂ ਆਉਣ ਵਾਲੇ ਕਈ ਉਤਪਾਦਾਂ 'ਤੇ 25 ਫੀਸਦੀ ਟੈਰਿਫ ਲਗਾਉਣ ਦਾ ਐਲਾਨ ਕੀਤਾ ਹੈ। ਇਸ 'ਤੇ ਪ੍ਰਤੀਕਿਰਿਆ 'ਚ ਭਾਰਤ ਸਰਕਾਰ ਕੁਝ ਵਸਤੂਆਂ ਦਾ ਅਮਰੀਕਾ ਤੋਂ ਆਯਾਤ ਵਧਾਉਣ 'ਤੇ ਵਿਚਾਰ ਕਰ ਰਹੀ ਹੈ ਤਾਂ ਜੋ ਅਮਰੀਕਾ ਨਾਲ ਰਿਸ਼ਤੇ ਬਿਹਤਰ ਬਣਾਏ ਜਾ ਸਕਣ ਪਰ ਬਲੂਮਬਰਗ ਦੀ ਇਕ ਰਿਪੋਰਟ ਮੁਤਾਬਕ, ਇਸ ਸੂਚੀ 'ਚ ਕੋਈ ਨਵਾਂ ਰੱਖਿਆ ਉਪਕਰਣ, ਜਿਵੇਂ ਕਿ F35 ਲੜਾਕੂ ਜਹਾਜ਼ ਸ਼ਾਮਲ ਨਹੀਂ ਹੋਵੇਗਾ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਭਾਰਤ ਤੁਰੰਤ ਬਦਲਾ ਲੈਣ ਵਾਲੇ ਕਦਮ ਚੁੱਕਣ ਦੀ ਬਜਾਏ ਦੁਵੱਲੇ ਵਪਾਰ ਗੱਲਬਾਤ ਜਾਰੀ ਰੱਖਣਾ ਚਾਹੁੰਦਾ ਹੈ। ਭਾਰਤ ਅਮਰੀਕਾ ਤੋਂ ਕੁਦਰਤੀ ਗੈਸ, ਸੰਚਾਰ ਉਪਕਰਣ ਅਤੇ ਸੋਨੇ ਵਰਗੀਆਂ ਵਸਤਾਂ ਦੀ ਦਰਾਮਦ ਵਧਾ ਸਕਦਾ ਹੈ। ਦੂਜੇ ਪਾਸੇ, ਰੱਖਿਆ ਖਰੀਦਦਾਰੀ ਦੇ ਮਾਮਲੇ ਵਿੱਚ, ਮੋਦੀ ਸਰਕਾਰ ਨਵੇਂ ਅਮਰੀਕੀ ਹਥਿਆਰ ਖਰੀਦਣ ਦੀ ਯੋਜਨਾ ਨਹੀਂ ਬਣਾ ਰਹੀ ਹੈ। ਇਹ ਇਸ ਲਈ ਵੀ ਮਹੱਤਵਪੂਰਨ ਹੈ ਕਿਉਂਕਿ ਟਰੰਪ ਨੇ ਰੂਸ ਤੋਂ ਹਥਿਆਰ ਅਤੇ ਤੇਲ ਖਰੀਦਣ 'ਤੇ ਭਾਰਤ ਨੂੰ ਵਾਧੂ ਜੁਰਮਾਨੇ ਦੀ ਧਮਕੀ ਵੀ ਦਿੱਤੀ ਹੈ।
ਭਾਰਤ ਨੇ ਅਮਰੀਕਾ ਨੂੰ ਸਪੱਸ਼ਟ ਕਰ ਦਿੱਤਾ ਹੈ ਕਿ ਉਹ F-35 ਸਟੀਲਥ ਲੜਾਕੂ ਜਹਾਜ਼ ਖਰੀਦਣ ਵਿੱਚ ਦਿਲਚਸਪੀ ਨਹੀਂ ਰੱਖਦਾ। ਇਸ ਸਾਲ ਦੇ ਸ਼ੁਰੂ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਦੀ ਵ੍ਹਾਈਟ ਹਾਊਸ ਫੇਰੀ ਦੌਰਾਨ, ਟਰੰਪ ਨੇ ਭਾਰਤ ਨੂੰ ਇਹ ਜੈੱਟ ਵੇਚਣ ਦੀ ਪੇਸ਼ਕਸ਼ ਕੀਤੀ ਸੀ ਪਰ ਭਾਰਤ ਨੇ ਰੱਖਿਆ ਉਪਕਰਣਾਂ ਨੂੰ ਸਾਂਝੇ ਤੌਰ 'ਤੇ ਵਿਕਸਤ ਕਰਨ ਅਤੇ ਭਾਰਤ ਵਿੱਚ ਉਨ੍ਹਾਂ ਦੇ ਨਿਰਮਾਣ ਵਿੱਚ ਵਧੇਰੇ ਦਿਲਚਸਪੀ ਦਿਖਾਈ।
ਭਾਰਤ ਦੀ ਇਸ ਸਥਿਤੀ ਦਾ ਮਤਲਬ ਹੈ ਕਿ ਉਹ ਲਗਭਗ 50-60 ਰੂਸੀ Su-57 ਪੰਜਵੀਂ ਪੀੜ੍ਹੀ ਦੇ ਲੜਾਕੂ ਜਹਾਜ਼ ਖਰੀਦ ਸਕਦਾ ਹੈ। ਭਾਰਤ ਆਪਣਾ ਪੰਜਵੀਂ ਪੀੜ੍ਹੀ ਦਾ ਲੜਾਕੂ ਜਹਾਜ਼ AMCA (ਐਡਵਾਂਸਡ ਮੀਡੀਅਮ ਕੰਬੈਟ ਏਅਰਕ੍ਰਾਫਟ) ਬਣਾ ਰਿਹਾ ਹੈ ਪਰ ਇਹ 2035 ਤੱਕ ਪੂਰੀ ਤਰ੍ਹਾਂ ਤਿਆਰ ਨਹੀਂ ਹੋਵੇਗਾ। ਇਸ ਲਈ, ਭਾਰਤੀ ਹਵਾਈ ਸੈਨਾ ਨੇ ਚੀਨ ਅਤੇ ਪਾਕਿਸਤਾਨ ਦੀ ਵਧਦੀ ਹਵਾਈ ਸ਼ਕਤੀ ਦਾ ਮੁਕਾਬਲਾ ਕਰਨ ਲਈ ਪੰਜਵੀਂ ਪੀੜ੍ਹੀ ਦੇ ਲੜਾਕੂ ਜਹਾਜ਼ਾਂ ਦੇ ਤਿੰਨ ਸਕੁਐਡਰਨ ਖਰੀਦਣ ਦਾ ਫੈਸਲਾ ਕੀਤਾ ਹੈ। ਵਰਤਮਾਨ ਵਿੱਚ ਸਿਰਫ਼ F-35 ਅਤੇ Su-57 ਹੀ ਖਰੀਦ ਲਈ ਉਪਲੱਬਧ ਹਨ।
Credit : www.jagbani.com
