ਸਪੋਰਟਸ ਡੈਸਕ- ਧਰਮਸ਼ਾਲਾ ਟੀ-20 ਵਿੱਚ ਭਾਰਤ ਨੇ ਦੱਖਣੀ ਅਫਰੀਕਾ ਨੂੰ ਇੱਕ ਪਾਸੜ ਅੰਦਾਜ਼ 'ਚ 7 ਵਿਕਟਾਂ ਨਾਲ ਹਰਾ ਦਿੱਤਾ। ਪਹਿਲਾਂ ਗੇਂਦਬਾਜ਼ੀ ਕਰਦੇ ਹੋਏ ਭਾਰਤ ਨੇ ਦੱਖਣੀ ਅਫਰੀਕਾ ਨੂੰ 117 ਦੌੜਾਂ 'ਤੇ ਢੇਰ ਦਿੱਤਾ ਅਤੇ ਫਿਰ 15.5 ਓਵਰਾਂ ਵਿੱਚ ਮੈਚ ਜਿੱਤ ਲਿਆ। ਭਾਰਤ ਦੀ ਜਿੱਤ ਦੇ ਹੀਰੋ ਇਸਦੇ ਗੇਂਦਬਾਜ਼ ਸਨ, ਜਿਨ੍ਹਾਂ ਨੇ ਦੱਖਣੀ ਅਫਰੀਕਾ ਨੂੰ ਵੱਡਾ ਸਕੋਰ ਬਣਾਉਣ ਤੋਂ ਰੋਕਿਆ। ਅਰਸ਼ਦੀਪ ਸਿੰਘ ਅਤੇ ਵਰੁਣ ਚੱਕਰਵਰਤੀ ਨੇ 2-2 ਵਿਕਟਾਂ ਲਈਆਂ। ਕੁਲਦੀਪ ਯਾਦਵ ਨੇ ਵੀ 2 ਵਿਕਟਾਂ ਲਈਆਂ। ਹਾਰਦਿਕ ਪੰਡਯਾ ਅਤੇ ਸ਼ਿਵਮ ਦੂਬੇ ਨੇ 1-1 ਵਿਕਟ ਲਈ।
ਧਰਮਸ਼ਾਲਾ 'ਚ ਬਦਲਾ ਪੂਰਾ
ਦੱਖਣੀ ਅਫਰੀਕਾ ਨੇ ਦੂਜੇ ਟੀ-20 ਮੈਚ ਵਿੱਚ ਭਾਰਤ ਨੂੰ ਬੁਰੀ ਤਰ੍ਹਾਂ ਹਰਾਇਆ ਸੀ। ਧਰਮਸ਼ਾਲਾ ਵਿੱਚ ਟੀਮ ਇੰਡੀਆ ਨੇ ਸ਼ਾਨਦਾਰ ਵਾਪਸੀ ਕੀਤੀ ਹੈ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਬੁਮਰਾਹ ਵੀ ਇਸ ਮੈਚ 'ਚ ਨਹੀਂ ਖੇਡੇ। ਅਕਸ਼ਰ ਪਟੇਲ ਵੀ ਪਲੇਇੰਗ ਇਲੈਵਨ ਤੋਂ ਬਾਹਰ ਸੀ ਪਰ ਇਸ ਦੇ ਬਾਵਜੂਦ, ਅਰਸ਼ਦੀਪ ਸਿੰਘ ਅਤੇ ਹਰਸ਼ਿਤ ਰਾਣਾ ਨੇ ਟੀਮ ਨੂੰ ਇੱਕ ਵਧੀਆ ਸ਼ੁਰੂਆਤ ਦਿੱਤੀ। ਅਰਸ਼ਦੀਪ ਨੇ ਪਹਿਲੇ ਹੀ ਓਵਰ ਵਿੱਚ ਰੀਜ਼ਾ ਹੈਂਡਰਿਕਸ ਨੂੰ 0 'ਤੇ ਆਊਟ ਕਰ ਦਿੱਤਾ। ਹਰਸ਼ਿਤ ਰਾਣਾ ਨੇ ਡੀ ਕੌਕ ਦੀ ਮਹੱਤਵਪੂਰਨ ਵਿਕਟ ਲਈ, ਜੋ ਸਿਰਫ ਇੱਕ ਦੌੜ ਬਣਾ ਸਕਿਆ। ਹਰਸ਼ਿਤ ਰਾਣਾ ਨੇ ਡੇਵਾਲਡ ਬ੍ਰੇਵਿਸ ਨੂੰ ਵੀ ਆਊਟ ਕੀਤਾ। ਸਟੱਬਸ 9 ਅਤੇ ਬੋਸ਼ ਸਿਰਫ 4 ਦੌੜਾਂ ਬਣਾ ਸਕੇ। ਕਪਤਾਨ ਮਾਰਕਰਾਮ ਨੇ 46 ਗੇਂਦਾਂ ਵਿੱਚ 61 ਦੌੜਾਂ ਦੀ ਪਾਰੀ ਖੇਡੀ, ਪਰ ਵਰੁਣ ਚੱਕਰਵਰਤੀ ਨੇ ਵਿਚਕਾਰਲੇ ਓਵਰਾਂ ਵਿੱਚ 11 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ। ਕੁਲਦੀਪ ਯਾਦਵ ਨੇ ਵੀ 12 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ।
ਅਭਿਸ਼ੇਕ ਨੇ ਦਿਵਾਈ ਤੂਫਾਨੀ ਸ਼ੁਰੂਆਤ
ਅਭਿਸ਼ੇਕ ਸ਼ਰਮਾ ਨੇ ਟੀਮ ਇੰਡੀਆ ਨੂੰ ਤੂਫਾਨੀ ਸ਼ੁਰੂਆਤ ਦਿਵਾਈ। ਖਿਡਾਰੀ ਨੇ ਸਿਰਫ 18 ਗੇਂਦਾਂ 'ਚ 35 ਦੌੜਾਂ ਬਣਾਈਆਂ। ਉਸਨੇ 3 ਛੱਕੇ ਅਤੇ 3 ਚੌਕੇ ਲਗਾਏ। ਸ਼ੁਭਮਨ ਗਿੱਲ ਨੇ 28 ਦੌੜਾਂ ਬਣਾਈਆਂ ਪਰ ਉਹ ਕਈ ਵਾਰ ਆਊਟ ਹੋਣ ਤੋਂ ਬਚੇ ਅਤੇ ਅਖੀਰ 'ਚ ਉਹ 100 ਦੇ ਸਟ੍ਰਾਈਕ ਰੇਟ ਨਾਲ ਹੀ ਬੈਟਿੰਗ ਕਰ ਸਕੇ। ਤਿਲਕ ਵਰਮਾ ਨੇ ਨਾਬਾਦ 25 ਦੌੜਾਂ ਦਾ ਯੋਗਦਾਨ ਦਿੱਤਾ। ਸੂਰਿਆਕੁਮਾਰ ਯਾਦਵ ਫਿਰ ਫੇਲ੍ਹ ਰਹੇ, ਉਨ੍ਹਾਂ ਨੇ ਸਿਰਫ 12 ਦੌੜਾਂ ਬਣਾਈਆਂ। ਸ਼ਿਵਮ ਦੁਬੇ ਨੇ ਨਾਬਾਦ 10 ਦੌੜਾਂ ਦਾ ਯੋਗਦਾਨ ਦਿੱਤਾ। ਭਾਰਤੀ ਟੀਮ ਅਗਲਾ ਮੈਚ ਲਖਨਊ 'ਚ 17 ਦਸੰਬਰ ਨੂੰ ਖੇਡੇਗੀ।
Credit : www.jagbani.com
