ਨਵੀਂ ਦਿੱਲੀ: ਅੱਜ ਦੇ ਡਿਜੀਟਲ ਦੌਰ ਵਿੱਚ ਬਹੁਤ ਸਾਰੇ ਲੋਕ ਫੋਨ ਨੰਬਰ ਰਾਹੀਂ ਕਿਸੇ ਦੀ ਲੋਕੇਸ਼ਨ ਜਾਣਨ ਦੀ ਕੋਸ਼ਿਸ਼ ਕਰਦੇ ਹਨ, ਪਰ ਇੰਟਰਨੈਟ 'ਤੇ ਮੌਜੂਦ ਜ਼ਿਆਦਾਤਰ ਤਰੀਕੇ ਜਾਂ ਤਾਂ ਅਧੂਰੇ ਹੁੰਦੇ ਹਨ ਜਾਂ ਫਿਰ ਯੂਜ਼ਰ ਨੂੰ ਗੁੰਮਰਾਹ ਕਰਦੇ ਹਨ। ਮਾਹਰਾਂ ਅਨੁਸਾਰ, ਬਿਨਾਂ ਇਜਾਜ਼ਤ ਕਿਸੇ ਦੀ ਲਾਈਵ ਲੋਕੇਸ਼ਨ ਟ੍ਰੈਕ ਕਰਨਾ ਆਸਾਨ ਨਹੀਂ ਹੈ ਅਤੇ ਕਈ ਮਾਮਲਿਆਂ ਵਿੱਚ ਇਹ ਗੈਰ-ਕਾਨੂੰਨੀ ਵੀ ਹੋ ਸਕਦਾ ਹੈ।
ਸਿਰਫ਼ ਪੁਲਸ ਕੋਲ ਹੈ ਭਰੋਸੇਯੋਗ ਤਰੀਕਾ
ਫੋਨ ਨੰਬਰ ਦੀ ਸਹੀ ਲੋਕੇਸ਼ਨ ਟ੍ਰੈਕ ਕਰਨ ਦਾ ਸਭ ਤੋਂ ਭਰੋਸੇਯੋਗ ਤਰੀਕਾ ਸਿਰਫ਼ ਪੁਲਸ ਅਤੇ ਸਰਕਾਰੀ ਏਜੰਸੀਆਂ ਕੋਲ ਹੁੰਦਾ ਹੈ। ਇਸ ਪ੍ਰਕਿਰਿਆ ਵਿੱਚ ਟੈਲੀਕਾਮ ਕੰਪਨੀਆਂ ਦੀ ਮਦਦ ਲਈ ਜਾਂਦੀ ਹੈ, ਜਿਸ ਲਈ ਅਦਾਲਤ ਦਾ ਹੁਕਮ ਹੋਣਾ ਜ਼ਰੂਰੀ ਹੈ। ਆਮ ਲੋਕਾਂ ਲਈ ਇਹ ਸੁਵਿਧਾ ਉਪਲਬਧ ਨਹੀਂ ਹੈ, ਇਸ ਲਈ ਕਿਸੇ ਅਜਿਹੇ ਐਪ ਜਾਂ ਵੈੱਬਸਾਈਟ 'ਤੇ ਭਰੋਸਾ ਨਹੀਂ ਕਰਨਾ ਚਾਹੀਦਾ ਜੋ ਅਜਿਹਾ ਦਾਅਵਾ ਕਰਦੀ ਹੋਵੇ।
ਐਪਸ ਦੀ ਸੱਚਾਈ
ਕੁਝ ਕਾਲਰ ਆਈਡੀ ਐਪਸ ਕਿਸੇ ਨੰਬਰ ਨਾਲ ਜੁੜੀ ਮੁੱਢਲੀ ਜਾਣਕਾਰੀ ਜਿਵੇਂ ਕਿ ਨਾਮ, ਖੇਤਰ ਅਤੇ ਟੈਲੀਕਾਮ ਆਪਰੇਟਰ ਬਾਰੇ ਦੱਸ ਸਕਦੇ ਹਨ, ਪਰ ਇਹ ਲਾਈਵ ਲੋਕੇਸ਼ਨ ਨਹੀਂ ਦੱਸ ਸਕਦੇ। ਅੱਜ-ਕੱਲ੍ਹ ਮਜ਼ਬੂਤ ਪ੍ਰਾਈਵੇਸੀ ਫੀਚਰਸ ਕਾਰਨ ਇੰਟਰਨੈੱਟ ਤੋਂ ਜਾਣਕਾਰੀ ਕੱਢਣਾ ਹੋਰ ਵੀ ਮੁਸ਼ਕਲ ਹੋ ਗਿਆ ਹੈ।
ਕੀ ਹਨ ਸੁਰੱਖਿਅਤ ਤਰੀਕੇ:
ਜੇਕਰ ਤੁਸੀਂ ਕਿਸੇ ਦੀ ਸਹੀ ਲੋਕੇਸ਼ਨ ਜਾਣਨਾ ਚਾਹੁੰਦੇ ਹੋ, ਤਾਂ ਸਭ ਤੋਂ ਸੁਰੱਖਿਅਤ ਤਰੀਕਾ ਉਸ ਦੀ ਸਹਿਮਤੀ ਲੈਣਾ ਹੈ। WhatsApp ਅਤੇ Google Maps ਵਰਗੇ ਐਪਸ ਵਿੱਚ ਲੋਕੇਸ਼ਨ ਸ਼ੇਅਰਿੰਗ ਦਾ ਫੀਚਰ ਮਿਲਦਾ ਹੈ, ਜਿਸ ਰਾਹੀਂ ਯੂਜ਼ਰ ਆਪਣੀ ਲਾਈਵ ਜਾਂ ਮੌਜੂਦਾ ਲੋਕੇਸ਼ਨ ਸਾਂਝੀ ਕਰ ਸਕਦਾ ਹੈ। ਇਸ ਤੋਂ ਇਲਾਵਾ, ਤੁਸੀਂ ਆਪਣੀ ਈਮੇਲ ਆਈਡੀ ਅਤੇ Google ਦੇ 'Find My Device' ਫੀਚਰ ਰਾਹੀਂ ਵੀ ਆਪਣੇ ਐਂਡਰਾਇਡ ਫੋਨ ਨੂੰ ਟ੍ਰੈਕ ਕਰ ਸਕਦੇ ਹੋ, ਬਸ਼ਰਤੇ ਫੋਨ ਦਾ ਇੰਟਰਨੈੱਟ ਅਤੇ ਲੋਕੇਸ਼ਨ ਸੇਵਾਵਾਂ ਚਾਲੂ ਹੋਣ।
ਡਾਟਾ ਚੋਰੀ ਦਾ ਖਤਰਾ
ਲੋਕਾਂ ਨੂੰ ਅਣਜਾਣ ਥਰਡ-ਪਾਰਟੀ ਐਪਸ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ। ਇਹ ਐਪਸ ਅਕਸਰ ਗਲਤ ਦਾਅਵੇ ਕਰਕੇ ਤੁਹਾਡਾ ਡਾਟਾ ਚੋਰੀ ਕਰ ਸਕਦੇ ਹਨ ਅਤੇ ਤੁਹਾਡੀ ਨਿੱਜਤਾ (privacy) ਲਈ ਖਤਰਾ ਪੈਦਾ ਕਰ ਸਕਦੇ ਹਨ।
Credit : www.jagbani.com
