ਬਿਜ਼ਨੈੱਸ ਡੈਸਕ : ਜੇਕਰ ਤੁਸੀਂ ਵੀ ਨੌਕਰੀ ਦੇ ਇੰਟਰਵਿਊ ਦੌਰਾਨ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਟੂਲਸ ਦੀ ਮਦਦ ਲੈ ਕੇ ਕੰਪਨੀ ਨੂੰ ਚਕਮਾ ਦੇਣ ਬਾਰੇ ਸੋਚ ਰਹੇ ਹੋ, ਤਾਂ ਸਾਵਧਾਨ ਹੋ ਜਾਓ। ਭਾਰਤ ਦੀਆਂ ਦਿੱਗਜ ਕੰਪਨੀਆਂ ਨੇ ਹੁਣ ਅਜਿਹੇ 'ਚਲਾਕ' ਉਮੀਦਵਾਰਾਂ 'ਤੇ ਨਕੇਲ ਕਸਣੀ ਸ਼ੁਰੂ ਕਰ ਦਿੱਤੀ ਹੈ।
ਹਰ ਤੀਜਾ ਉਮੀਦਵਾਰ ਕਰ ਰਿਹਾ ਹੈ ਧੋਖਾਧੜੀ
ਹਾਲ ਹੀ ਵਿੱਚ ਸਾਹਮਣੇ ਆਈ 'InCruiter' ਦੀ ਇੱਕ ਰਿਪੋਰਟ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। 20,000 ਤੋਂ ਵੱਧ ਇੰਟਰਵਿਊਜ਼ ਦੇ ਵਿਸ਼ਲੇਸ਼ਣ ਤੋਂ ਪਤਾ ਲੱਗਾ ਹੈ ਕਿ ਹਰ ਤਿੰਨ ਵਿੱਚੋਂ ਇੱਕ ਉਮੀਦਵਾਰ (ਲਗਭਗ 33%) ਲਾਈਵ ਇੰਟਰਵਿਊ ਦੌਰਾਨ ਸਿੱਧੇ ਤੌਰ 'ਤੇ AI ਟੂਲਸ ਦੀ ਵਰਤੋਂ ਕਰ ਰਿਹਾ ਹੈ। ਉਮੀਦਵਾਰ ਇੰਟਰਵਿਊ ਦੌਰਾਨ ਦੂਜੀ ਸਕ੍ਰੀਨ 'ਤੇ ChatGPT ਚਲਾਉਣ, ਲੁਕਵੇਂ ਬ੍ਰਾਊਜ਼ਰ ਟੈਬਾਂ ਦੀ ਵਰਤੋਂ ਕਰਨ ਅਤੇ ਇੱਥੋਂ ਤੱਕ ਕਿ ਵੌਇਸ ਕਲੋਨਿੰਗ (ਆਵਾਜ਼ ਬਦਲਣ ਵਾਲੇ ਸਾਫਟਵੇਅਰ) ਵਰਗੇ ਹੱਥਕੰਡੇ ਅਪਣਾ ਰਹੇ ਹਨ।
ਇਨ੍ਹਾਂ ਵੱਡੀਆਂ ਕੰਪਨੀਆਂ ਨੇ ਵਧਾਈ ਸਖ਼ਤੀ
ਕਾਰਪੋਰੇਟ ਇੰਡੀਆ ਹੁਣ ਇਸ ਧੋਖਾਧੜੀ ਨੂੰ ਰੋਕਣ ਲਈ ਪੂਰੀ ਤਰ੍ਹਾਂ ਤਿਆਰ ਹੈ। ਡੇਲੋਇਟ (Deloitte), ਡਿਊਸ਼ ਬੈਂਕ (Deutsche Bank), ਸਕੇਲਰ (Scaler) ਅਤੇ ਮੀਸ਼ੋ (Meesho) ਵਰਗੀਆਂ ਵੱਡੀਆਂ ਕੰਪਨੀਆਂ ਨੇ ਉਮੀਦਵਾਰਾਂ ਦੀ ਅਸਲ ਕਾਬਲੀਅਤ ਪਰਖਣ ਲਈ ਨਵੇਂ ਤਰੀਕੇ ਅਪਣਾਏ ਹਨ।
ਕਿਵੇਂ ਫੜੇ ਜਾਂਦੇ ਹਨ 'ਨਕਲੀ' ਉਮੀਦਵਾਰ?
ਕੰਪਨੀਆਂ ਹੁਣ ਇੰਟਰਵਿਊ ਦੌਰਾਨ ਕੁਝ ਖਾਸ ਨਿਸ਼ਾਨੀਆਂ 'ਤੇ ਨਜ਼ਰ ਰੱਖ ਰਹੀਆਂ ਹਨ, ਜਿਵੇਂ ਕਿ:
ਬਨਾਵਟੀ ਜਵਾਬ: ਜੇਕਰ ਜਵਾਬ ਬਹੁਤ ਜ਼ਿਆਦਾ ਪਾਲਿਸ਼ ਕੀਤੇ ਹੋਏ ਹਨ ਪਰ ਉਨ੍ਹਾਂ ਵਿੱਚ ਡੂੰਘਾਈ ਦੀ ਕਮੀ ਹੈ।
ਜਵਾਬ ਵਿੱਚ ਦੇਰੀ: ਸਵਾਲ ਪੁੱਛਣ ਅਤੇ ਜਵਾਬ ਦੇਣ ਦੇ ਵਿਚਕਾਰ ਅਣਸੁਭਾਵਿਕ ਦੇਰੀ, ਜੋ AI ਟੂਲ ਤੋਂ ਜਵਾਬ ਲੱਭਣ ਵੱਲ ਇਸ਼ਾਰਾ ਕਰਦੀ ਹੈ।
ਰੁਕ-ਰੁਕ ਕੇ ਬੋਲਣਾ: ਗੱਲਬਾਤ ਕਰਨ ਦਾ ਅਜੀਬ ਤਰੀਕਾ ਜਾਂ ਤਰਕ ਸਮਝਾਉਣ ਵਿੱਚ ਅਸਮਰੱਥਾ।
ਹੁਣ ਸਿਰਫ਼ ਰੱਟਾ ਨਹੀਂ, 'ਸੋਚ' ਦੀ ਹੋਵੇਗੀ ਪਰਖ
ਡੇਲੋਇਟ ਇੰਡੀਆ ਦੇ ਅਫ਼ਸਰ ਮੁਤਾਬਕ, ਹੁਣ ਕੰਪਨੀ ਅਜਿਹੇ ਸਵਾਲ ਪੁੱਛ ਰਹੀ ਹੈ ਜਿੱਥੇ ਉਮੀਦਵਾਰ ਨੂੰ ਆਪਣੀ ਸੋਚ ਅਤੇ ਤਰਕ (Logic) ਸਪਸ਼ਟ ਕਰਨਾ ਪੈਂਦਾ ਹੈ। ਹੁਣ ਲਾਈਵ ਪ੍ਰੋਬਲਮ ਸੋਲਵਿੰਗ ਅਤੇ ਸਿਮੂਲੇਸ਼ਨਾਂ ਰਾਹੀਂ ਇਹ ਦੇਖਿਆ ਜਾਂਦਾ ਹੈ ਕਿ ਉਮੀਦਵਾਰ ਮੁਸ਼ਕਲ ਹਾਲਾਤ ਵਿੱਚ ਕਿਵੇਂ ਫੈਸਲਾ ਲੈਂਦਾ ਹੈ। ਇਸ ਤੋਂ ਇਲਾਵਾ, ਨਿਗਰਾਨੀ ਲਈ ਸੁਰੱਖਿਅਤ ਬ੍ਰਾਊਜ਼ਰ ਅਤੇ ਐਡਵਾਂਸਡ ਮਾਨੀਟਰਿੰਗ ਟੂਲਸ ਦੀ ਵਰਤੋਂ ਵੀ ਕੀਤੀ ਜਾ ਰਹੀ ਹੈ।
ਸਪੱਸ਼ਟ ਹੈ ਕਿ ਤਕਨਾਲੋਜੀ ਦੇ ਦੌਰ ਵਿੱਚ ਕੰਪਨੀਆਂ ਹੁਣ ਉਮੀਦਵਾਰਾਂ ਦੀ 'ਅਸਲ' ਕਾਬਲੀਅਤ ਨੂੰ ਪਹਿਲ ਦੇ ਰਹੀਆਂ ਹਨ ਅਤੇ AI ਦੇ ਸਹਾਰੇ ਨੌਕਰੀ ਪਾਉਣ ਦੇ ਦਿਨ ਹੁਣ ਲੱਦ ਚੁੱਕੇ ਹਨ।
Credit : www.jagbani.com
